Këshilltari i Erdoganit: Turqia ka garantuar për lirimin e Thaçit nga Haga
Sabri Demiri, kryekëshilltar i presidentit të Turqisë për Ballkanin, ka thënë se Turqia ka garantuar për lirimin e ish-presidentit të Kosovës, Hashim Thaçi nga Haga.
Demiri ka deklaruar se Turqia është një nder vendet e para që ka garantuar për lirimin e Thaçit, ku ka shtuar se në rast se gjykata vendosë që Thaçi të gjykohet në liri, në këtë rast ai do të qëndronte si mysafir në Turqi.
“Qëndrimi i Turqisë ka qenë çdo herë kundër akuzimit të liderëve të zgjedhur nga populli me zgjedhje demokratike. Mirëpo edhe pse tash nuk mund të përzihemi gjatë procesit gjyqësor, ne si Turqi kemi dërguar edhe garanci në Hagë që në qoftë se caktohet një vendim që gjyqi të vazhdojë në liri, Thaçin mund ta kemi mysafir në Turqi”, ka thënë Demiri në Info Magazine në Klan Kosova.
“Prej tyre nuk kemi marrë përgjigje konkrete. Kjo ka qenë dy apo tre muaj pasi filloi procesi gjyqësor ndaj tij. Ishin disa shtete që kishin shprehur këtë dëshirë dhe ne ishim të parët. Kemi filluar me ministrinë e Drejtësisë së Turqisë dhe Ministrinë e Jashtme. Jemi të parët si shtet që kemi shprehur këtë dëshirë”, ka vazhduar ai.
