KEK-ut i rekomandohet t’i shfrytëzojë 7 milionë eurot e subvencionimit për rrymë
Korporata Energjetike e Kosovës (KEK) përmes një njoftimi ka bërë të ditur se sot ka pranuar rekomandime nga Komiteti Teknik për Energji, ku rekomandimi kryesor është shfrytëzimi i 7 milionë eurove nga subvencioni i qeverisë për import të energjisë elektrike.
Sipas KEK-ut, ky rekomandim ka ardhur për të mbuluar kërkesën vendore, me qëllim të furnizimit të pandërprerë me energji elektrike dhe eliminimit të devijimeve.
“Aktualisht, KEK është duke punuar intensivisht me Ministrinë e Ekonomisë në finalizimin e marrëveshjes për jetësimin e rekomandimeve të Komitetit Teknikë të Energjisë”, thuhet në njoftim.
Në njoftim thuhet edhe se KEK-u po vazhdon të pranoj një sasi të caktuar të energjisë elektrike nga Korporata Elektro-energjetike Shqiptare.
“Kjo sasi po merret nga depozitimi që KEK-u kishte bërë për disa muaj në KESH dhe po vazhdon të depozitoj sa herë që KEK-u ka teprica. E gjithë kjo me qëllim furnizimit të konsumatorëve fundor dhe evitimin e reduktimeve. Në këtë drejtim, KEK deri më tani ka depozituar mbi 120.000 MËh, ndërsa gjatë 4 ditëve të fundit nga KESH-i kemi pranuar rreth 3,500 MËh”, thuhet në njoftimin e KEK-ut.
