Izreali thotë se ka dëmtuar rëndë kapacitetet operative dhe të komunikimit të regjimit iranian

The New York Times , duke iu referuar pretendimeve të zyrtarëve izraelitë, raportoi se mbi 7,000 goditje janë kryer në Iran në pak më shumë se dy javë, me fokus te programi balistik dhe objektet e regjimit

Sulmet izraelite në territorin iranian kanë shkaktuar “prishje masive në operacionet dhe aftësitë e komunikimit të regjimit”, shkroi mediumi, duke cituar Shosh Bedrosian, zëdhënëse e Zyrës së Kryeministrit të Izraelit, gjatë një konference për shtyp.

Sipas saj, që nga nisja e luftës pak më shumë se dy javë më parë, ushtria izraelite pretendon se ka kryer mbi 7,000 goditje në të gjithë Iranin. Nga këto, rreth 4,700 kanë pasur në shënjestër lokacione të lidhura me programin iranian të raketave balistike, ndërsa 2,000 të tjera janë drejtuar ndaj “selive, objekteve strategjike dhe aseteve të regjimit”.

Deklaratat e zyrtares izraelite sugjerojnë një intensifikim të ndjeshëm të operacioneve ushtarake të Izraelit kundër infrastrukturës ushtarake dhe institucionale iraniane, në një moment kur tensionet në rajon mbeten jashtëzakonisht të larta.

Sipas The Times, nëse konfirmohen në terren, këto goditje mund të kenë pasoja të mëdha për aftësinë e Iranit për të koordinuar operacionet e tij ushtarake dhe për të ruajtur funksionimin normal të strukturave shtetërore.