Italia u bën thirrje qytetarëve të saj të largohen nga Irani
Ministria e Jashtme e Italisë të premten u bëri thirrje qytetarëve të saj që ndodhen në Iran të largohen nga ky shtet dhe të tjerëve që të kenë vigjilencë të lartë në mbarë Lindjen e Mesme, duke i përmendur si arsye kushtet jostabile të sigurisë.
“Italianëve [në Iran] për turizëm ose prania e të cilëve nuk është prerazi e nevojshme, u bëhet thirrje të largohen” – thuhet në një deklaratë, ku shtohet se dekurajohet fuqishëm edhe udhëtimi në Irak dhe Liban, raporton agjencia e lajmeve “Reuters”.
Ministria i këshilloi shtetasit italianë në Izrael që të kenë kujdes maksimal dhe të qëndrojnë vigjilentë.
Disa shtete kanë lëshuar paralajmërime të ngjashme ditëve të fundit. Britania të premten tha se e kishte tërhequr përkohësisht stafin nga Ambasada e saj në Teheran dhe e kishte mbyllur atë.
Shtetet e Bashkuara kanë grumbulluar prani të madhe ushtarake në Lindjen e Mesme para një sulmi të mundshëm ndaj Iranit, në kohën kur bisedimet mes dy vendeve rreth ambicieve bërthamore të Teheranit po vazhdojnë pa ndonjë shenjë për përparim të madh.
