Gjuajtja me armë zjarri në Dragodan, nga QKUK tregojnë për gjendjen e të plagosurit
Nga QKUK kanë dhënë detaje në lidhje me gjendjen e personit që u plagos pas një gjuajtje me armë zjarri në “Dragodan”.
Nazmi Kolgeci, drejtor i Kirurgjisë Torakale, ka thënë se “kanë arritur t’i shpëetojnë jetën në momentin e fundit”.
“Nga plagosja, viktima ka pësuar shok hemorragjik, ku ka humbur edhe sasi të madhe të gjakut. Viktima është plagosur në anën e majtë të torkasit, ku kirurgu dhe drejtori i Klinikës së Kirurgjisë Torakale, Nazmi Kolgeci dhe Bedri Osmani bashkë me ekipin kujdestar e kanë kryer intervenimin dhe kemi arritur ta shpëtojmë dhe stabilizojmë” - ka thënë ai për Klan Kosova.
Ndërkaq, i plagosuri pas operimit është dërguar për trajtim në Klinikën e Anestezionit me Mjekim Intensiv.
Ndryshe, zëdhënësi i policisë për rajonin e Prishtinës, Agron Borovci ka konfirmuar për Nacionalen se rasti ka ndodhur rreth orës 19:00.
“Rreth orës 19:00, është raportuar për shkrepje të armës së zjarrit në rrugën “Mine Peza” në Prishtinë.
Me të marrë informatën, policia ka dalë në vendin e ngjarjes dhe nga informacionet e para është bërë e ditur se një person është plagosur nga arma e zjarrit dhe se i njëjti është dërguar në QKUK për trajtimin e nevojshëm mjekësor” - ka thënë ai.
Tutje, Borovci ka treguar se aktualisht është identifikuar një i dyshuar në lidhje me rastin.
“Aktualisht policia ka identifikuar një të dyshuar të përfshirë në rastin në fjalë, po ashtu edhe dy vetura, ndërkaq po vazhdon punën e saj operativo-hetimore si dhe të ekzaminimit të vendngjarjes me qellim të sqarimin e plotë të rrethanave që karakterizojnë ngjarjen”.
