Gjini: Kosova po shet qymyrin dhe po blen energjinë 100 herë më shtrenjtë
Kryetari i Aleancës, Ardian Gjini, ka kritikuar ashpër qeverisjen për politikat energjetike, duke e akuzuar atë për dështim në zhvillimin e kapaciteteve vendore për prodhimin e energjisë.
Gjini kujtoi se Aleanca kishte reaguar fuqishëm si për anulimin e projektit energjetik “Kosova C”, ashtu edhe për prishjen e marrëveshjes me “ContourGlobal”, ndërsa sipas tij, partitë e tjera kishin heshtur.
Ai kritikoi situatën aktuale, ku Kosova, sipas tij, shet qymyrin dhe më pas detyrohet të blejë energji shumë më shtrenjtë. Gjini e krahasoi këtë qasje me praktikat e vendeve të prapambetura, duke theksuar se problemi, sipas tij, nuk qëndron te qytetarët, por te qeverisja e dëmshme dhe e korruptuar.
“Ky është karakteri i qeverisjes që 6 vite”, shkroi Gjini, duke paralajmëruar se, sipas tij, situata energjetike mund të përkeqësohet edhe më tej.
E plotë
A duam t'i ngjasojmë Evropës apo vendeve të botës së tretë?!
Kur është anuluar projekti energjetik "Kosova C", vetëm Aleanca ka reaguar shumë fuqishëm. Të tjerët e kanë mbyllur gojën, kush e di se pse?!
Kur u prish projekti energjetik me "ContourGlobal", përsëri reagoi vetëm Aleanca.
Kjo qeveri ka gjetur arsyetime nga më bizaret për të mos prodhuar energji në Kosovë. Tani shesim qymyr e blejmë energji, madje 100 fish më shtrenjtë.
Kështu u ndodh vendeve më të prapambetura në botë, atyre që quhen vendet e botës së tretë.
Dhe pa asnjë dyshim, kjo nuk ndodh ngaqë njerëzit atje janë të këqij, por sepse qeveritë e tyre janë të dëmshme dhe të korruptuara.
Po duket se ende asgjë nuk kemi parë.
Ky është karakteri i qeverisjes që 6 vite.
Dhe as nuk iu vjen turp!
