FSK-ja organizon Kursin Bazik të Oficerëve të Këmbësorisë
Ministria e Mbrojtjes ka njoftuar se FSK-ja për herë të parë po organizon Kursin Bazik të Oficerëve të Këmbësorisë.
Në njoftimin e ministrisë është thënë se ky kurs ka për mision që të trajnojë dhe zhvillojë oficerë të këmbësorisë për të qenë të përgatitur psiqikisht, fizikisht dhe moralisht për të udhëhequr njësi të këmbësorisë.
“Ministri Maqedonci së bashku me Komandantin e FSK-së, gjeneral-lejtënant Bashkim Jashari vizituan Kampin e Vrellës ku aktualisht po zhvillohet Kursi Bazik i Oficerëve të Këmbësorisë. Bazuar në prioritetet e KOMFSK-së për zhvillimin e programeve të shkollimit, Forca e Sigurisë së Kosovës për herë të parë brenda vendit po organizon Kursin Bazik të Oficereve të Këmbësorisë (KBOK) në Shkollën e Oficerëve të Akademisë së Mbrojtjes. Ky kurs ka për mision që të trajnojë dhe zhvillojë oficerë të këmbësorisë për të qenë të përgatitur psiqikisht, fizikisht dhe moralisht për të udhëhequr njësi të këmbësorisë”, është thënë në njoftimin e ministrisë.
Me tej, tregohet kohëzgjatja e këtij trajnimi dhe detyrat që do të ekzekutohen.
“KBOK është kurs 13 javor që trajnon oficerët e rinj për aftësi taktike të avancuara të këmbësorisë dhe të udhëheqjes në fushëbetejë; vlerëson potencialin e udhëheqjes dhe kualifikon kandidatët për udhëheqje në fushën e këmbësorisë. Detyrat kyçe që do të ekzekutohen gjatë këtij kursi janë: manovrimi taktik, sinkronizimi i aseteve te këmbësorisë se lehtë, përgatitja fizike, dhe zjarri preciz me armët e këmbësorisë së lehtë. Kursi po mbështetet nga ekipet amerikane të Organizata për Asistencë Ushtarake të Trajnimeve Mobileve e Ushtrisë Amerikane (SATMO) ndërsa tash e tutje do të organizohet çdo vit në kuadër të planit vjetor të trajnimeve”, është thënë në njoftimin e ministrisë.
