Evakuohet një qendër tregtare në Gjermani, dyshohet për pengmarrje
Policia gjermane ka evakuuar një qendër tregtare dhe zonën përreth saj në qytetin lindor gjerman, Dresden, për shkak të dyshimeve për pengmarrje, sipas një deklarate të autoriteteve të sigurisë.
“Departamenti i Policisë së Dresdenit është tash për tash duke kryer një operacion në qendër të Dresdenit. Prapavija është dyshimi për një situatë pengmarrjeje”- thuhet në deklaratën e publikuar në uebfaqen e policisë.
E përditshmja e njohur gjermane, “Bild”, raportoi se një burrë i armatosur ka vrarë një grua, pastaj është futur në hapësirën e një radio-stacioni dhe ka qëlluar para se të largohej e të hynte në një qendër tregtare, ku ka marrë disa pengje, raporton agjencia “Reuters”, përcjell gazeta Nacionale.
Radio Dresdeni raportoi në uebfaqen e saj se një burrë i armatosur ka hyrë në ndërtesën Ammonhof, ku ndodhet radio-stacioni, dhe se ka pasur të shtëna.
Policia nuk i konfirmoi hollësitë e raportuara nga Radioa Dresdeni dhe gazeta “Bild”, por u bëri thirrje qytetarëve që ta shmangin qendrën e qytetit. Autoritetet njoftuan se tregu i famshëm i Kërshëndellave, “Striezelmarkt”, do të mbetet i mbyllur tash për tash.
Përditësim [12:44]
Gazeta "Bild" raporton se sulmuesi i dyshuar është një burrë 40-vjeçar, i cili dyshohet se e ka vrarë nënën e vet 70-vjeçare. Raportohet se sulmuesi është fshehur në një barnatore, ku ka marrë disa pengje.
Policia thotë se e ka kontaktuar përmes telefonit personin e dyshuar për marrje të pengjeve.
