Dy muaj negociata, Orav flet për kompromisin e Kurtit rreth Ligjit për të Huajt
Aivo Orav, ambasador i Bashkimit Evropian në Kosovë, ka folur për marrëveshjen e arritur me Qeverinë Kurti lidhur me zbatimin e Ligjit për të huajt.
Në një intervistë për Kallxo, Orav u shpreh se palët u dakorduan për nevojën e “disa hapave shtesë që ndoshta duhet të ndërmerren”, duke theksuar se vendimi për shtyrjen e ligjit u mor në “mesnatë”.
“Dua të them, kjo nuk është vetëm një element i kësaj marrëveshjeje. Çështja kryesore ishte që ligji për të huajt është shtyrë tashmë dy herë. Dhe pasi ligji të miratohet dhe në njëfarë mënyre të vlerësohet edhe nga partnerët ndërkombëtarë këtu, atëherë ligjet duhet më në fund të zbatohen. Dhe mendoj se është shumë e rëndësishme që qeveria tani të ecë përpara me zbatimin e plotë të ligjit për të huajt. Ndërkohë, ajo që u dakordua ishte se kishte disa hapa shtesë që ndoshta duhet të ndërmerren. Dhe kur ligji u shty në mesnatë, ose u ra dakord të shtyhej më 15 janar, atëherë ne gjithashtu krijuam një proces për ta trajtuar këtë çështje me ekspertët tanë, nga vendet tona, së bashku me qeverinë, duke u takuar për të parë se si po ecën zbatimi.”, tha ai.
Orav konfirmoi se negociatat kishin zgjatur dy muaj, por nuk ishin bërë publike.
“Po, sigurisht. Dua të them, nëse negociata të tilla zhvillohen, ato nuk bëhen në publik, nuk ka shumë transparencë nëse vërtet dëshiron të arrish një rezultat. Sepse nëse gjërat bëhen publike gjatë negociatave, kjo do të thotë që njëra apo pala tjetër nuk dëshiron të arrijë një rezultat ose dëshiron ta vërë palën tjetër nën presion. Pra, ne po diskutonim, po, me qeverinë. Ne gjithashtu kontaktuam me komunitetin gjerman këtu. Peter Sirens tha se ishte shumë i angazhuar praktikisht gjithashtu. Dhe në fund, ky rezultat erdhi sepse qeveria e kuptoi që kjo është çështja që duhet të zgjidhet”, ka deklaruar ai.
