Cakolli: Partitë u pajtuan që nënkryetarët e Kuvendit të votohen në një pako

Eugen Cakolli nga KDI, me anë të një shkrimi ka thënë se subjektet politike gjatë mbledhjes së kësaj të marte, aty ku është bërë përgatitja e seancës konstituive, kanë rënë dakord që çështja e nënkryetarëe të votohet në pako. Sipas Cakollit kjo është një zgjidhje në përputhje me Aktgjykimin e Gjykatës Kushtetuese.

Ndryshe, Lëvizja Vetëvendosje e kishte bllokuar legjistraturen e kaluar disa herë në këtë pikë.

E plotë:

Në mbledhjen e sotme përgatitore për seancën konstituive ka pasur dakordim që nënkryetarët të votohen në pako. Jo vetëm ata të komuniteteve, por të gjithë pesë nënkryetarët e Kuvendit.

Kjo mënyrë votimi është në përputhje me kuadrin kushtetues, pasi Gjykata Kushtetuese e ka lënë teknikën e votimit në diskrecion të vetë Kuvendit, për sa kohë respektohen të drejtat e propozimit dhe shumica e nevojshme për zgjedhje.

Për më tepër, votimi në pako ka logjikë të qartë institucionale dhe ka qenë zgjidhje funksionale edhe në të kaluarën. Kjo shpejton konstituimin dhe e detyron përgjegjësinë politike të ndahet mes të gjitha grupeve parlamentare. Megjithatë, ironikisht, pikërisht kjo praktikë që e patëm kërkuar vitin e kaluar ishte kundërshtuar nga ata që sot e shtynë përpara, madje ishte paraqitur si problem parimor.

E gjithë kjo, tregon se praktikat parlamentare marrin kuptim nga mënyra si përdoren. Kur shërbejnë për ta çuar përpara konstituimin dhe funksionimin e Kuvendit, ato mbeten mjete legjitime të rendit parlamentar.