Bislimi për kthimin e Listës Serbe në Kuvend: Demaskim i ndytë i Beogradit
Zëvendëskryeministri i parë, Besnik Bislimi, në një intervistë në televizionin publik ka ka folur për kthimin e deputetëve të Listës Serbe në Kuvendin e Kosovës.
Bislimi ka thënë se ka thënë se kthimi i tyre dëshmon se largimi i këtye deputetëve ka qenë pjesë e strategjisë së Beogradit dhe është demaskim i lojërave të ndyta të autoriteteve të Serbisë para komunitetit ndërkombëtar, por edhe vetë qytetarëve serbë, të cilët e kanë votuar këtë subjekt politik.
“Për mua kthimi i Listës Serbe sot në Kuvend apo zëvendësimi i ulëseve nga vet ata, është demonstrim i qartë i argumentit tonë se largimi i tyre nuk ka pasur kurrfarë baze pakënaqësie eventuale por ka qenë pjesë e strategjisë së Beogradit. Nga momenti i largimit deri në momentin e kthimit nuk ka ndodhë kurrfarë ndryshimi. Rrjedhimisht, siç e kanë thënë vet ata, kjo është pjesë e strategjisë së tyre, pra po tregojnë se janë duke ndërtuar strategji për të dobësuar funksionalizimin e institucioneve tona”, ka theksuar Bislimi.
Sipas Bislimit ky është demaskim edhe para komunitetit ndërkombëtar, “edhe pse ata shumica e dinë se këto janë lojëra të ndyta politike të Beogradit, jo të Listës Serbe”.
“Mirëpo, ndoshta është pozitive që ky është demaskim edhe para vetë qytetarëve serbë që i kanë votuar. Mandati i deputetit kërkohet me një synim, që të promovohen e shtyhen përpara interesat e një grupi të caktuar. Lista Serbe ka shtyrë zero interesa. Me këtë i ka treguar qytetarëve se synimi im nuk është t’i shtyjë agjendat apo interesat tuaja por të pengojë agjendat e shtetit të Kosovës”, ka shtuar Bislimi.
