Avdullah Hoti deklaron votën e vet kundër Bekim Sejdiut, “Jo.”
“Jo,” i ka thënë gazetës Nacionale, Avdullah Hoti, pyetur se a ka votë për Bekim Sejdiun për president të vendit.
Hoti është nga deputetët e parë të LDK-së të deklaruar kundër ujdisë së Abdixhikut me Kurtin për Bekim Sejdiun si kandidat dypartiak për president.
"Nuk e përkrah këtë kandidaturë për President të Republikës së Kosovës, jo për arsye personale, por për një parim politik dhe institucional. Presidenti i Republikës duhet të jetë figurë unifikuese, e cila ndërton konsensus përtej interesave partiake dhe përfaqëson interesin e përgjithshëm të qytetarëve. Në vlerësimin tim, kjo kandidaturë nuk e përmbush këtë kriter," tha Hoti për gazetën Nacionale.
"Njëkohësisht, kjo kandidaturë nuk pasqyron interesat politike dhe parimore të Lidhjes Demokratike të Kosovës dhe elektoratit të saj. Përkundrazi, mënyra se si është imponuar kjo zgjidhje krijon përshtypjen se LDK ka penguar edhe kandidatura të tjera politike, vetëm për t’i hapur rrugë një kandidature që, në thelb, është po ashtu politike. LDK duhet të ketë një qëndrim të qartë, të pavarur dhe të përgjegjshëm. Nuk mund të mbështesim një kandidaturë vetëm për hir të një marrëveshjeje politike, nëse ajo nuk përfaqëson parimet, interesat dhe pritjet e elektoratit të LDK-së. Kjo nuk është çështje individësh. Është çështje e parimeve, identitetit politik dhe përgjegjësisë që kemi ndaj votuesve tanë.
Sejdiu kishte qenë gjyqtar raportues për Gjykatën Kushtetuese në Aktgjykimin që kishte rrëzuar Qeverinë Hoti që i çeli udhën për ardhjen në pushtet Vetëvendosjes.
