Ambasada amerikane reagon sërish: Kosova e pavarur është fakt
Ambasada e SHBA-ve në Kosovë, ka reaguar sërish në rrjetin social Twitter, duke thënë se Kosova e pavarur është fakt i kryer.
Ky reagim vjen pasi Ambasada amerikane tregoi që nuk ka bërë qëllimshëm asnjë pëlqim të presidentit serb Aleksandër Vuçiq, ku fliste për çnjohjen e Kosovës nga disa shtete.
Tash ambasada ka thënë se qëllimi kryesor i tyre është të mbështesin Kosovën dhe se kundërshtojnë përpjekjet për të vënë në pikëpyetje pavarësinë e Kosovës.
“Le të jemi të qartë: Pavarësia e Kosovës është fakt. Qëllimi ynë kryesor është që ta përkrahim Kosovën përderisa e merr vendin e vet me të drejtë në strukturat evropiane e euro-atlantike. Ne kundërshtojmë kategorikisht çfarëdo përpjekjeje për t'i vënë në pikëpyetje pavarësinë dhe sovranitetin e Kosovës.”, thuhet në reagimin e tyre.
Let's be clear: Kosovo's independence is a fact. Our primary goal is to support Kosovo as it takes its rightful place in European and Euro-Atlantic structures. We categorically oppose any effort to call into question Kosovo's independence and sovereignty. 1/2
— U.S. Embassy Pristina (@USEmbPristina) January 5, 2023
