Abdixhiku e pret në takim njoftues ambasadorin e ri të OSBE-së në Kosovë
Kryetari i LDK-së, Lumir Abdixhiku, e ka pritur në takim njoftues ambasadorin e ri të OSBE-së në Kosovë.
Postimi:
Kryetari i Lidhjes Demokratike të Kosovës, Lumir Abdixhiku, priti sot në takim njoftues ambasadorin e ri të Misionit të OSBE-së në Kosovë, z. Gerard McGurk, të cilin e uroi për marrjen e detyrës së re dhe i uroi suksese në mandatin e tij.
Gjatë takimit, Kryetari Abdixhiku dhe ambasadori McGurk diskutuan rreth zhvillimeve aktuale politike në vend, duke shkëmbyer qëndrime mbi sfidat dhe mundësitë që ndodhen përpara. Kryetari Abdixhiku prezantoi vizionin dhe qëndrimet e LDK-së për adresimin e situatës politike, përfshirë edhe propozimin për krijimin e një qeverie të unitetit.
Në këtë takim, Kryetari Abdixhiku shprehu mirënjohjen e tij për mbështetjen e vazhdueshme që OSBE i ka dhënë Republikës së Kosovës ndër vite, veçanërisht në fushat e forcimit të institucioneve demokratike, mbrojtjes së të drejtave të njeriut, promovimit të sundimit të ligjit dhe zhvillimit të proceseve zgjedhore.
Po ashtu u diskutua për mundësitë e bashkëpunimit të mëtejmë ndërmjet LDK-së dhe OSBE-së në Kosovë, me fokus në avancimin e demokracisë, forcimin e institucioneve dhe promovimin e pjesëmarrjes qytetare në jetën publike. Kryetari Abdixhiku theksoi gatishmërinë e LDK-së për të kontribuar në thellimin e bashkëpunimit me OSBE-në dhe miqtë ndërkombëtarë që mbështesin rrugëtimin demokratik të Kosovës.
