BE thotë se nga 2024 të gjithë telefonat inteligjentë do të bëhen me port karikimi USB-C

BE-ja ka hapur rrugën që të gjithë telefonave inteligjentë t'u kërkohet ligjërisht të përdorin një port USB-C për karikim, një lëvizje që mund të jetë dhimbje koke për Apple, iPhone i së cilës është i vetmi smartphone i markës kryesore pa këtë lloj lidhjeje.

The Guardian shkruan se, marrëveshja e BE-së do të gjejë zbatim nga vjeshta 2024 për të gjithë telefonat inteligjentë të shitur në bllok.

Portat USB-C u prezantuan në modelin MacBook 12 inç të Apple në vitin 2015 dhe në iPad Pro në fund të 2018, ndërsa iPad të tjerë kanë ardhur me portin që nga viti 2020.

BE tha se ndryshimi i rregullit synon të reduktojë problemet për konsumatorët si dhe mbetjet elektronike, pasi do t'u mundësojë konsumatorëve të përdorin karikues të vjetër për pajisjet e reja.

Rregullat do të zbatohen për "të gjitha pajisjet elektronike portative të vogla dhe të mesme", të cilat do të përfshijnë telefonat celularë, tabletët, kamerat, tastierat, altoparlantët, dhe kufjet.

Vendimi ende nuk është miratuar nga Parlamenti Evropian dhe Këshilli Evropian, por miratimi pritet të jetë vetëm një formalitet.

Lidhur me vendimin, zëdhënësi i Parlamentit Evropian Alex Agius Saliba tha se: “Sot ne e kemi bërë karikuesin e përbashkët realitet në Evropë. Konsumatorët evropianë ishin të frustruar prej kohësh me karikuesit e shumtë që grumbulloheshin me çdo pajisje të re. Tani ata do të jenë në gjendje të përdorin një karikues të vetëm për të gjitha pajisjet e tyre elektronike portative.”