Dhuna në familje: Haxhiu tregon se ka shtruar kërkesë për veprim ndaj 38 kryetarëve të Komunave

Ministrja e Drejtësisë Albulena Haxhiu e cila është edh e Koordinatore Kombëtare kundër dhunës në familje, dhunës ndaj grave dhe dhunës me baza gjinore, ka treguar përmes një statusi në Facebook se ka kërkuar nga 38 kryetarët e Komunave të Kosovës, të zbatojnë strategjinë e veprimit me hapa urgjent.

Më poshtë gjeni hapat, që sipas Haxhiut duhet të ndërmeren:

Në cilësinë e Koordinatores Kombëtare kundër dhunës në familje, dhunës ndaj grave dhe dhunës me bazë gjinore, javën e kaluar u jam drejtuar 38 kryetarëve të Komunave të Kosovës, me klrkesën për zbatim të obligimeve që dalin nga Strategjia kundër dhunës.

Krahas angazhimit nga niveli qendror, janë rreth 40 obligime që duhet të adresohen nga komunat ashtu që të kontribuohet përmbajtësisht në parandalimin dhe mbrojtjen nga dhuna në familje dhe ajo me bazë gjinore.

Me urgjencë duhet të veprohet në këto obligime:

Të mbështeten për pavarësim financiar viktimat e dhunës në familje:

Duke mbuluar pagesën për qera

Duke mbuluar shpenzimet mujore për të mbijetuarat

Subvencionimi i pagesave për kopshte të fëmijëve të viktimave të dhunës në familje dhe dhunës ndaj grave

Të pajisen me detektor të sigurisë të gjitha strehimoret dhe QPS-të nga komunat

Të shtohen kapacitetet njerëzore dhe profesionale në QPS, bazuar në analizën që ka bërë Ministria e Drejtësisë në të gjitha Komunat

Shtrirja e qasjes shumë-sektoriale të koordinuar të trajtimit të dhunës në familje dhe dhunës ndaj grave në mbarë Kosovën, përmes themelimit të Mekanizmave Koordinues në komunat ku mungojnë

Informimi i viktimave/të mbijetuarave të dhunës në familje e dhunës ndaj grave, si dhe publikut në tërësi, mbi të drejtat e tyre dhe shërbimet ku mund të marrin ndihmë, përfshirë ndihmën juridike falas për personat e ekspozuar ndaj dhunës, në një gjuhë që ato/ata e kuptojnë;

Mbështetja e strehimoreve me financim të vazhdueshëm;

Për të ofruar siguri dhe mirëqenie për vajzat dhe gratë, veprimi duhet të jetë i përbashkët dhe ndërinstitucional, në këtë drejtim, uroj që të gjithë kryrtarët të reflektojnë mbi politikat lokale dhe të zbatojnë obligimet që dalin nga Strategjia.