Zyrtari i Shtëpisë së Bardhë: Do të mbështesim Ukrainën për dokumentimin e krimeve të luftës
Shtëpia e Bardhë ka deklaruar se është e pasigurt nëse presidenti rus Vladimir Putin do të përballet ndonjëherë me drejtësinë për krime të dyshuara lufte, pas lëshimit të një urdhri për arrestimin e tij të premten nga Gjykata Ndërkombëtare Penale. Pavarësisht kësaj, ShBA do të vazhdojë të ndihmojë Ukrainën në regjistrimin e krimeve të Rusisë.
Koordinatori i Këshillit të Sigurisë Kombëtare për Komunikimet Strategjike John Kirby tha se ShBA-ja është e përkushtuar të ndihmojë Ukrainën të dokumentojë prova të krimeve të luftës, krimeve kundër njerëzimit dhe mizorive të kryera nga forcat ruse, raporton CNN.
Edhe pse ShBA nuk e njeh GJNP-në, Kirby theksoi se ata nuk do të heqin dorë nga besimi i tyre në nevojën për përgjegjësi për krimet e luftës, pavarësisht se sa kohë duhet.
Kirby shtoi se ShBA-të do të dëshironin të shihnin të gjithë ata që kanë kryer krime lufte të sillen para drejtësisë, por refuzoi të thoshte nëse presidenti Joe Biden do të urdhëronte arrestimin e Putinit nëse ai do të vizitonte ShBA-në, duke deklaruar se ishte "shumë, shumë e pamundur" që Putini do të udhëtonte atje.
Kirby deklaroi se do të jetë në dorën e vendeve të tjera që të marrin vendime sovrane në lidhje me arrestimin e Putinit. Megjithatë, meqenëse Rusia nuk e njeh GJPN-në dhe gjykata nuk kryen gjykime në mungesë, Putini do të duhej të ekstradohej nga Moska ose të arrestohej në një vend të huaj në mënyrë që të përballej me akuzat nga gjykata.
Kur u pyet nëse kishte ndonjë inteligjencë që sugjeronte se Kina do t'i jepte armë Rusisë për të ndihmuar në sulmin e tyre në Ukrainë, Kirby u përgjigj se nuk kishte asnjë konfirmim për veprime të tilla që po ndodhnin. Megjithatë, ai pranoi se Kina ende nuk e ka përjashtuar mundësinë e ofrimit të armëve për Rusinë.
Kirby shtoi se nuk është në interesin më të mirë të Kinës që të ndihmojë Putinin në masakrën e ukrainasve të pafajshëm.
Udhëheqësi kinez Xi Jinping do të vizitojë Moskën javën e ardhshme për t'u takuar me Putinin, gjë që do të shihet si një shfaqje e rëndësishme e mbështetjes për veprimet e Moskës në vendet perëndimore, ku shqetësimet për thellimin e marrëdhënieve midis Kinës dhe Rusisë janë ngritur ndërsa konflikti në Evropë vazhdon.
