Von der Leyen e propozon ekipin e saj të ri në Komisionin Evropian
Presidentja e Komisionit Evropian, Ursula von der Leyen, të martën e propozoi ekipin e vet, i cili do ta udhëheqë institucionin më të fuqishëm të BE-së gjatë pesë viteve të ardhshme, me fokus te sfidat e paraqitura nga ndryshimet klimatike, lufta në Ukrainë dhe ngritja e Kinës.
Andrius Kubilius nga Lituania mund të jetë komisioner i parë i mbrojtjes i Bashkimit Evropian. Ky rol i ri është caktuar për ta fuqizuar kapacitetin prodhues ushtarak të Evropës përballë agresionit rus në Ukrainë, raporton agjencia “Reuters”.
Ministrja e Energjisë dhe Mjedisit e Spanjës, Teresa Ribera, u propozua si komisionere e antitrustit, gjithashtu e angazhuar për “tranzicion të pastër, të drejtë dhe konkurrues”.
Në listën e komisionerëve të tjerë të propozuar të BE-së përfshihen ministri i Jashtëm i Francës, Stephane Sejourne, i ngarkuar për strategji industriale, dhe sllovaku Maros Sefcovic, që mund t’i mbikëqyrë politikat tregtare, e Kaja Kallas, e propozuar si shefe e politikës së jashtme.
I nominuari i Polonisë, Piotr Serafin, u propozua për pozitën e fuqishme të mbikëqyrësit të buxhetit të Bashkimit Evropian.
Të gjithë kandidatët do t’u nënshtrohen seancave me ligjvënës në Parlamentin Evropian, të cilët duhet ta nënshkruajnë emërimin e tyre.
Në ekipin e Komisionit Evropian që u paraqit nga zonja Von Der Leyen të martën ndodhen 11 gra, dukshëm më pak se baraspesha gjinore që e synonte zyrtarja e lartë. Megjithatë, ajo tha se dallimi ishte edhe më i madh para se ajo të negocionte me shtete anëtare, prandaj ato propozuan më shumë gra për këto pozita.
Every member of my team will bring in their own experience and perspectives on Europe.
— Ursula von der Leyen (@vonderleyen) September 17, 2024
Together, we will be one team, working towards one common goal.
To make Europe stronger. pic.twitter.com/xIvDNv4C7t
