Ukraina thotë se moti i lig po i ngadalëson sulmet e Rusisë në Avdivka
Zyrtarët ukrainas kanë thënë se moti i lig e ka ngadalësuar fushatën e Rusisë për ta siguruar pjesën lindore të Ukrainës dhe për ta kapur qytezën Avdivka.
Pas dy ditëve me stuhi – e me reshje bore në jug – parashikohet për më shumë reshje shiu në lindje, duke e bërë tokën të lagësht e të papërshtatshme për manovrime ushtarake, raporton gazeta “The Guardian”.
“Ata kanë filluar që ta bombardojnë qendrën e qytezës nga Donetsku. Brigada jonë është duke e mbajtur terrenin e vet, por nuk mund të shohim ndonjë pajisje duke ardhur”- tha Serhiy Tsekhotskyi, oficer ushtarak në këtë qytezë.
“Moti është i papërshtatshëm, por porsa të vijnë ngricat dhe toka të forcohet, një tentim për sulm me pajisje është i mundshëm”- shtoi ai.
Një zëdhënës tjetër ushtarak, Volodymyr Fitio, tha se moti i ka detyruar rusët që të bëjnë “përshtatje”.
“Nuk mund të përparoni, kur toka është kështu. Rusët më parë sollën rezerva dhe i hodhën ato në betejë. Ka shumë më pak lëvizje si ajo tani për shkak të motit”- tha më tej Fitio.
