Ukraina nis reduktime të rrymës në shumicën e rajoneve pas sulmeve ruse ndaj rrjetit
Ndërprerje urgjente të rrymës kanë filluar të zbatohen në pothuajse mbarë Ukrainën pas një fushate intensive të sulmeve ajrore ruse ndaj infrastrukturës energjetike.
Ministria e Energjisë tha se vetëm dy rajone të vendit nuk janë prekur. Përpos shënjestrimit të rrjetit energjetik, Rusia gjithnjë e më shumë i ka vënë në cak hekurudhat e Ukrainës. Në anën tjetër, forcat ukrainase i kanë shtuar sulmet ndaj rafinerive ruse të naftës në rajonet kufitare por edhe më thellë brenda territorit rus, raporton televizioni BBC.
Një depo nafte në Krimenë e aneksuar ilegalisht nga Rusia në vitin 2014 ka qenë duke u djegur për tri ditë pas një sulmi të dytë ukrainas me dron brenda një jave.
Shtabi i Përgjithshëm i ushtrisë ukrainase tha të mërkurën se 16 cisterna janë dëmtuar dhe se një zjarr i shkallës së lartë po vazhdonte të ishte aktiv.
Shtimi i sulmeve me dronë ndaj rafinerive të naftës dhe naftësjellësve ka shkaktuar shtrenjtim dhe mungesë karburanti në disa pjesë të Rusisë. Udhëheqësit ukrainas shpresojnë se kjo gjendje do t’i godasë përpjekjet e Rusisë në luftë dhe do ta sjellë Kremlinin në tavolinën e bisedimeve.
Në Ukrainë, Ministria e Energjisë tha se kufizime urgjente do të zbatohen “për shkak të situatës së ndërlikuar”. Ekipet po bënin punë urgjente në të gjitha rajonet e prekura nga sulmi rus, tha operatori i rrjetit elektrik, “Ukrenergo”, duke u bërë thirrje konsumatorëve që ende kishin furnizim që ta kursenin energjinë.
Temperaturat në disa pjesë të Ukrainës u parashikuan që të bien në 3 gradë Celsius në natën mes së mërkurës dhe të enjtes.
Rusia argumenton se sulmet ndaj infrastrukturës së energjisë të Ukrainës e kanë për qëllim goditjen e ushtrisë, por miliona civilë tashmë janë prekur nga ndërprerjet javëve të fundit./Nacionale
