Udhëheqësit suedezë dhe turq të ndarë rreth përparimit në bisedimet e NATO-s

Kryeministrja Magdalena Andersson, i ka cilësuar bisedimet e vazhdueshme të anëtarësimit në NATO midis Suedisë, Finlandës dhe Turqisë "të mira dhe konstruktive", me gjithë raportimet se presidenti turk, Rexhep Tajip Erdogan, është i pakënaqur me mënyrën se si ato janë zhvilluar deri më tani, raporton agjencia e lajmeve TT.

Këtë fundjavë, media turke raportoi se Erdogan është i pakënaqur me mënyrën se si janë zhvilluar bisedimet me Suedinë dhe Finlandën për anëtarësimin në NATO. Sipas tij, ato nuk kanë arritur “nivelin e dëshiruar”.

Megjithatë, në një konferencë shtypi në Bruksel të martën (31 maj), Andersson ishte e kujdesshme në lidhje me komentimin e deklaratave të Erdoganit.

“Ne mendojmë se bisedimet kanë qenë të mira dhe konstruktive,” tha ajo, duke shtuar se Suedia “do të vazhdojë të ketë bisedime me Turqinë në nivele të ndryshme. Është një dialog që do të vazhdojë”.

Në krye të "koncesioneve" në lidhje me shqetësimet e Ankarasë për Partinë e jashtëligjshme të Punëtorëve të Kurdistanit (PKK) dhe degët e bazës së saj në Irak dhe Siri, Erdogan gjithashtu dëshiron që Suedia të heqë atë që ai e quan një embargo armësh, pavarësisht se zyrtarisht nuk është e tillë. Megjithatë, sipas transmetuesit televiziv SVT, Suedia nuk ka eksportuar asnjë armë në Turqi që nga viti 2019 dhe më parë e ka çuar këtë çështje në nivel të BE-së.

Për më tepër, ministrja e Jashtme suedeze, Ann Linde, vuri në dukje më parë pasaktësitë në pretendimet e Erdoganit për marrëdhëniet e Suedisë me PKK-në, duke i quajtur deklaratat turke "akuza të rënda që nuk kanë bazë".

Megjithatë, Partia e Gjelbër tha se është e shqetësuar se qeveria do t'i dorëzohet kërkesave të Erdoganit dhe po i bën thirrje Lindes që të ofrojë shpjegimet e saj në parlament.

Andersson tha se ajo nuk do të zbulonte taktikat e negociatave për mediat. “Mendoj se është më mirë të negociosh në një dhomë takimesh sesa përmes medias,” tha ajo, por nuk konfirmoi nëse do të udhëtonte në Ankara për të takuar Erdoganin kur u pyet nga gazetarët.

“Ne do të shqyrtojmë se cilat forma të takimeve dhe lokacione janë më të mirat. Ne do të bëjmë atë që mendojmë se është më e mira për procesin”, shtoi ajo.

Që Suedia të anëtarësohet në NATO, të 30 vendet anëtare, përfshirë Turqinë, duhet ta miratojnë kërkesën.