Turqia e lëshon në orbitë satelitin e parë komunikues vendës, "Turksat 6A"
Turqia të martën herët e lëshoi në orbitë satelitin e parë komunikues të prodhuar brenda vendit, “Turksat 6A”. Ankaraja tha se ky veprim do ta zgjerojë mbulimin satelitor të vendit dhe do t’i plotësojë nevojat e transmetimit televiziv.
Raketa “Falcon 9” e kompanisë “SpaceX” e dërgoi satelitin turk në hapësirë nga qendra “Space Launch Complex 40” në Florida të Shteteve të Bashkuara, raporton agjencia “Reuters”.
Presidenti turk, Rexhep Erdogan, tha se nisja e këtij sateliti e shënon hapjen e një “faze të re” për Turqinë në prodhimin e satelitëve.
“Si Turqi, ne prodhuam më shumë se 81 për qind të nënsistemeve, stacioneve tokësore satelitore dhe softuerëve në projektin 6A, i cili ka rëndësi të madhe për të ardhmen e vendit tonë në hapësirë, me burime kombëtare” – tha ai.
Ministri i Infrastrukturës dhe Transportit, Abdulkadir Uraloglu, tha se sinjali i parë nga sateliti “Turksat 6A” u pranua 67 minuta pas nisjes së tij, siç ishte planifikuar, duke shtuar se sateliti do ta zgjerojë mbulimin e Turqisë në pesë miliardë njerëz.
“Ne do t’i kemi sjellë komunikimet tona, transmetimet tona televizive në një nivel më të sigurt, më të mirë” – tha ai, duke shtuar se sateliti “Turksat 6A” tani do t’i mundësojë Turqisë që të arrijë me sinjale edhe në Indi, Indonezi, Malajzi dhe Tajlandë.
Falcon 9 launches the @Turksat 6A mission to orbit from Florida pic.twitter.com/D5ZYGqTXgh
— SpaceX (@SpaceX) July 9, 2024
Turqia edhe më parë ka nisur satelitë përmes raketave të kompanisë “SpaceX”. Ministri Uraloglu tha se sateliti “Turksat 6A” është rezultat i një përpjekjeje 10-vjeçare për të prodhuar një satelit brenda vendit, duke shtuar se Turqia ka hyrë në grupin prej 11 shteteve që e kanë bërë këtë./Nacionale
