Trumpi thotë se, për marrëveshjen bërthamore, Arabia Saudite duhet ta njohë Izraelin

Marrëveshja mes Shteteve të Bashkuara dhe Arabisë Saudite për ta ndihmuar Riadin që të zhvillojë energji bërthamore varet nga njohja e Shtetit të Izraelit nga Arabia Saudite, ka thënë presidenti amerikan, Donald Trump.

“Marrëveshja Bërthamore Civile (Nuk do të ketë pasurim të materialit!)... e cila i takon vetëm përdorimit jo-ushtarak... do të miratohet, por është tërësisht subjekt i bashkimit të Arabisë Saudite me Akordet shumë të respektuara dhe të suksesshme të Abrahamit” – shkroi Trumpi në rrjetin “Truth Social”.

Akordet e Abrahamit, të ndërmjetësuara nga Trumpi, e kanë sjellë njohjen e Izraelit nga pesë shtete, përfshirë dy vende arabe, raporton televizioni BBC.

Arabia Saudite ka thënë më parë se nuk do ta njohë Izraelin pa themelimin e një shteti palestinez.

Gjatë mandatit të parë të Trumpit si president i Shteteve të Bashkuara, Emiratet e Bashkuara Arabe dhe Bahrejni i nënshkruan Akordet e Abrahamit, duke rezultuar në një normalizim historik të marrëdhënieve mes Izraelit dhe dy vendeve arabe.

Këto marrëveshje janë nënshkruar edhe nga Sudani, Maroku dhe Kazakistani.

Arabia Saudite deri më tani nuk u është përgjigjur komenteve të Trumpit, të cilat vijnë pas kritikave nga ekspertët se marrëveshja e njoftuar të mërkurën mund të paraqesë rrezik për pasurim bërthamor në të ardhmen në një rajon tashmë jostabil.

Nuk qe menjëherë e qartë nëse kushti për t’iu bashkuar Akordeve të Abrahamit është i përcaktuar në tekstin e marrëveshjes bërthamore, e cila nuk është publikuar, apo nëse Arabia Saudite është pajtuar me këtë kusht.

Televizioni BBC e ka kontaktuar Shtëpinë e Bardhë për koment.

Ndërkohë, Izraeli e mirëpriti deklaratën e Trumpit. Duke shkruar në rrjetin X, zyra e kryeministrit izraelit, Benjamin Netanyahu, tha se bashkimi i Arabisë Saudite në Akordet e Abrahamit “do të ishte një hap historik përpara për paqe në Lindjen e Mesme”./Nacionale