Trump urdhëron pezullim 90-ditor të tarifave të reja, përveç ndaj Kinës
Presidenti i ShBA-së, Donald Trump tha se po vendos një pezullim 90-ditor për tarifat e reja, ndërkohë që lufta e tij tregtare po trondit ekonominë globale.
Në të njëjtën kohë, ai njoftoi se po rrit normat e tarifave ndaj Kinës në 125%, duke e përshkallëzuar luftën e tij të ndërsjellë me Pekinin.
Trump tha se ka “autorizuar një PAUZË 90-ditore dhe një Tarifë të Ulët Reciproke gjatë kësaj periudhe, prej 10%, e cila hyn në fuqi menjëherë.”
Në të njëjtin mesazh, Trump tha se po rrit tarifat amerikane ndaj Kinës ndërsa përpiqet ta sjellë Pekinin në tryezën e negociatave.
Nga ana tjetër, Bashkimi Evropian ka rënë dakord të vendosë tarifa hakmarrëse për mallra amerikane në vlerë prej 21 miliardë eurosh, duke synuar prodhimet bujqësore në aktin e parë të hakmarrjes ndaj tarifave të vendosura nga Donald Trump, raporton The Guardian.
BE planifikon të vendosë tarifa prej 25% për dhjetëra mallra, nga bajamet deri te jahtet, me mbledhjen e tarifave që fillon më 15 prill, ndërsa pjesa më e madhe hyn në fuqi më 15 maj dhe pjesa tjetër më 1 dhjetor.
Në një deklaratë që konfirmon votën pozitive nga shtetet anëtare të BE-së, Komisioni Evropian tha: “BE i konsideron tarifat amerikane të pajustifikuara dhe të dëmshme, duke shkaktuar dëme ekonomike për të dyja palët, si dhe për ekonominë globale.”
