Trump thotë se 'absolutisht' do ta konsideronte mundësinë për ta bombarduar sërish Iranin
Presidenti amerikan Donald Trump ka thënë se do ta konsideronte “absolutisht” mundësinë për të bombarduar sërish Iranin.
Duke iu përgjigjur një pyetjeje nga gazetarja e BBC-së, Nomia Iqbal, gjatë një konference për shtyp në Shtëpinë e Bardhë, ai tha se do ta sulmonte “pa asnjë dyshim” vendin nëse shërbimet e inteligjencës do të nxjerrnin përfundime se Irani mund të pasuronte uranium në nivele shqetësuese.
Shtetet e Bashkuara u përfshinë drejtpërdrejt në konfliktin mes Izraelit dhe Iranit fundjavën e kaluar, duke goditur vendndodhje të rëndësishme bërthamore me bomba të tipit “bunker buster”, përpara se Trump të kërkonte me shpejtësi një armëpushim.
Në një fjalim të enjten, Udhëheqësi Suprem i Iranit, Ayatollah Ali Khamenei, deklaroi se këto sulme nuk kishin arritur ndonjë rezultat të rëndësishëm, por të premten Trump përsëriti pretendimin e tij se vendndodhjet bërthamore të Iranit ishin “shkatërruar plotësisht”.
Më vonë të premten, përmes platformës së tij sociale “Truth Social”, Trump shkroi se e dinte “SAKTË” se ku ishte strehuar Ayatollahu dhe se kishte ndaluar personalisht forcat e armatosura izraelite dhe amerikane që ta kishin si objektiv.
Kuptohet se udhëheqësi iranian ishte detyruar të fshihej gjatë luftës dy-javore mes Iranit dhe Izraelit.
Të gjitha palët në konflikt kanë shpallur fitoren, me Ayatollahun që u tha iranianëve se Izraeli dhe Irani kishin dështuar të ndalonin programin bërthamor të vendit.
Megjithatë, ministri i jashtëm iranian Abbas Araghchi më vonë pranoi se dëm “i tepruar dhe serioz” ishte shkaktuar ndaj vendndodhjeve bërthamore të vendit nga bombardimet e fundit të SHBA-së dhe Izraelit.
