Të paktën 18 të vrarë nga shpërthimi në xhaminë afgane, përfshirë klerikun pro talibanëve
Së paku 18 persona vdiqën të premten nga një shpërthim në një xhami të mbushur me njerëz në perëndim të Afganistanit. Në mesin e të vdekurve është një klerik i njohur, i afërt me talibanët, thanë zyrtarët talibanë dhe një mjek.
Shpërthimi nq qytetin Herat e la oborrin e xhamisë “Guzargah” të mbushur me trupa, ndërsa tokën me shenja gjaku, siç shihet në disa video. Njerëzit dëgjoheshin duke bërtitur të tmerruar: “Zoti është i madh”.
Bomba shpërtheu gjatë namazit të së premtes, kur xhamitë janë plot me besimtarë, shkruan “Associated Press”, përcjell Nacionale.
Në mesin e të vdekurve është Mujib-ul Rahman Ansari, klerik i njohur në mbarë Afganistanit për kritikat ndaj qeverive të përkrahura nga Perëndimi në dy dekadat e fundit.
Anasi shihej si i afërt me talibanët, të cilët e morën kontrollin në Afganistan para një viti, pas tërheqjes së forcave të huaja.
Vdekja e tij është konfirmuar nga zëdhënësi kryesor i talibanëve, Zabihullah Mujahid. Pak para shpërthimit, Ansari u takua në një pjesë tjetër të qytetit me zëvendëskryeministrin e qeverisë së talibanëve, Mullah Abdul Ghani Baradar, i cili ishte për vizitë në Herat.
Me autoambulanca u transportuan për në spitale në Herat 18 trupa dhe 21 persona të lënduar nga shpërthimi, tha Mohammad Daud Mohammadi, zyrtar në qendrën ambulantore në Herat.
Asnjë grup nuk e mori menjëherë përgjegjësinë për shpërthimin e përgjakshëm të së premtes.
Muajin e kaluar, nga një shpërthim në një xhami të kryeqytetit Kabul u vra një klerik pro talibanëve. Përgjegjësinë për këtë sulm e mori ISIS-i, grup që shpesh i ka goditur xhamitë me sulme vetëvrasëse gjatë lutjeve të së premtes./Nacionale
