Tajlanda kërcënon me pezullim të paktit të armëpushimit me Kamboxhian
Tajlanda të hënën kërcënoi me pezullim të marrëveshjes së armëpushimit me Kamboxhian, që ishte ndërmjetësuar nga Shtetet e Bashkuara. Kryeministri tajlandez tha se të gjitha veprimet që janë pjesë e paktit do të ndërpriten, vetëm disa orë pasi shpërthimi i një mine tokësore në zonën e brishtë kufitare la të lënduar dy ushtarë tajlandezë.
Tajlanda dhe Kamboxhia nënshkruan një marrëveshje armëpushimi në një samit të mbajtur në Malajzi muajin e kaluar, pasi mosmarrëveshjet territoriale mes dy vendeve fqinje të Azisë Juglindore çuan në luftime vdekjeprurëse 5-ditore në fund të korrikut, kur u vranë dhjetëra njerëz, raporton agjencia e lajmeve “Associated Press”.
Kryeministri Anutin Charnvirakul tha se incidenti i së hënës tregon që “armiqësia ndaj sigurisë sonë kombëtare nuk ka pushuar siç kemi menduar”, duke shtuar se të gjitha veprimet që janë pjesë e marrëveshjes do të ndalen derisa të përmbushen kërkesat e Tajlandës.
Ai nuk dha hollësi për kërkesat e vendit të tij dhe nuk pati përgjigje nga Qeveria e Kamboxhias.
Sipas kushteve të armëpushimit, Tajlanda duhet të lirojë 18 ushtarë kamboxhianë që po mbahen në burg dhe të dyja palët do ta fillojë largimin e armëve të rënda dhe minave tokësore nga zona kufitare.
Ushtria Mbretërore Tajlandeze tha se një rreshter e humbi këmbën e djathtë, pasi kishte shkelur në një minë tokësore gjatë patrullimit të hënën përgjatë kufirit në provincën Sisaket, ndërsa një ushtar tjetër pësoi shtrëngim në gjoks nga ndikimi i shpërthimit. Të dy ushtarët po marrin trajtim në spital, thuhet në njoftim.
