Sulmet izraelite lanë 20 palestinezë të vrarë në Gaza, thonë mjekët

Një varg sulmesh ushtarake izraelite në pjesë të ndryshme të Rripit të Gazës lanë të vrarë të paktën 20 njerëz të mërkurën, thanë mjekët.

Tetë njerëz u vranë nga një sulm në zonën Salateen të qytetit Beit Lahiya në veri, afër vendit ku Ministria e Shëndetësisë në Gaza tha se të paktën 93 njerëz u vranë ose u zhdukën nga një sulm ajror izraelit ndaj një shtëpie shumëkatëshe të martën, raporton agjencia “Reuters”.

Shtetet e Bashkuara e quajtën sulmin “tmerrues”. Nuk pati koment të menjëhershëm nga Izraeli për asnjërin prej sulmeve.

Shërbimi emergjent në Gaza tha se operacionet e tij ishin ndërprerë për shkak të sulmit më shumë se trejavor izraelit në veri të Gazës. Izraeli thotë se fushata e tij është për shkatërrimin e Hamasit, luftëtarët e të cilit janë rigrupuar në zonë.

Ndërkohë, të paktën shtatë palestinezë u vranë nga sulmet izraelite në pjesët jugore dhe qendrore të Gazës më herët të mërkurën, thanë mjekët. Në lagjen Sheikh Radwan të Qytetit Gaza, pesë njerëz u vranë e disa të tjerë u plagosën nga një sulm izraelit afër një klinike, thanë mjekët dhe banorët.

Ushtria izraelite ka dërguar tanke në Beit Lahiya, Beit Hanoun dhe Jabalia, kampet më të mëdha prej tetë kampeve historike në Gaza dhe fokusi i ofensivës së re ushtarake.