Spitali i Gazës goditet nga një sulm izraelit, thotë Hamasi
Një sulm izraelit ka shkatërruar repartet e kujdesit intensiv dhe të kirurgjisë të institucionit kryesor mjekësor në Qytetin e Gazës, ka thënë Hamasi, ka raportuar BBC.
Video të publikuara në internet duket se tregojnë flakë të mëdha dhe tym që ngrihet nga Spitali Al-Ahli Baptist pas goditjes nga raketat e një ndërtese dy-katëshe. Njerëz, përfshirë disa pacientë ende në shtretërit e spitalit, janë filmuar duke u larguar me nxitim nga vendi i ngjarjes.
Një gazetar lokal tha se Forcat e Mbrojtjes të Izraelit (IDF) kishin telefonuar një mjek dhe kishin dhënë një paralajmërim për evakuim.
Hamasi e quajti sulmin një “krim të tmerrshëm” nga Izraeli, i cili tha se ishte duke hetuar raportimet.
Sipas shërbimit të emergjencës civile, nuk janë raportuar viktima.
Gazetari lokal, i cili po punonte në spital, tha se një oficer i ushtrisë izraelite kishte telefonuar një mjek që po punonte në repartin e urgjencës dhe i kishte kërkuar që të evakuonte menjëherë spitalin.
“Të gjithë pacientët dhe personat e zhvendosur duhet të dalin në një distancë të sigurt,” citohet të ketë thënë oficeri.
“Keni vetëm 20 minuta për t'u larguar.”
Pamje të postuara në rrjetet sociale treguan stafin dhe pacientët duke lënë ndërtesën ndërsa jashtë ishte ende errësirë.
Dhjetëra palestinezë, përfshirë gra dhe fëmijë, u panë gjithashtu duke ikur nga një oborr brenda spitalit ku kishin kërkuar strehim.
Al-Ahli – një institucion i vogël mjekësor para luftës – është tani i vetmi spital që ende funksionon në Qytetin e Gazës pas shkatërrimit të kompleksit mjekësor Al-Shifa dhe spitaleve në pjesën veriore të Rripit.
