Skandal në Rumani, mjekët nën hetime për ripërdorim të implanteve kardiake të nxjerra nga kufomat
Prokurorët rumunë kanë njoftuar se është ngritur hetim penal ndaj disa mjekëve mbi dyshimet se kanë marrë qindra implante mjekësore nga kufomat dhe i kanë ripërdorur te pacientët e gjallë.
Në një deklaratë të lëshuar, është bërë e ditur se një nga pesë mjekët që kanë punuar në një spital në qytetin Iasi, është arrestuar nën akuzat për shpërdorim pushteti dhe marrje ryshfeti.
Prokurorët kanë thënë se mjeku i paidentifikuar ka mbikëqyrur një rrjet prej katër mjekësh të tjerë, të cilët i kanë dorëzuar implantet kardiake të marra nga pacientët e vdekur pa miratim paraprak as nga ata, as nga familjet e tyre.
Prokurorët kanë nxjerrë pretendime se mjeku i arrestuar, ka kryer 238 procedura gjatë shtatë viteve që nga viti 2017, duke përdorur në mënyrë të paligjshme implante të nxjerra nga pacientë të vdekur ose me origjinë të panjohur dhe duke i vënë pacientët e tij në rrezik të komplikimeve serioze ose vdekjes.
Sistemi i kujdesit shëndetësor i Rumanisë, është një nga më pak të zhvilluarit brenda Bashkimit Evropian dhe besohet se është i goditur nga korrupsioni, joefikasiteti dhe menaxhimi i politizuar.
Sipas The Guardian, në tre dekadat e fundit shteti ka ndërtuar vetëm një spital, shpenzon më pak sesa vendet e tjera në BE për kujdesin shëndetësor dhe ka dhjetëra mijëra mjekë dhe infermierë që kanë emigruar.
