Si mund të ndikojnë zgjedhjet presidenciale të Francës në luftën Rusi-Ukrainë

Kryeqyteti i Francës mund të jetë mijëra milje larg nga fushat e betejës në Ukrainën lindore, por ajo që ndodh në qendrat e votimit francez këtë muaj mund të ketë ndikim edhe atje.

Kandidatja presidenciale e ekstremit të djathtë Marine Le Pen ka lidhje të ngushta me Rusinë dhe dëshiron të dobësojë Bashkimin Evropian dhe NATO-n, gjë që mund të zvogëlojë përpjekjet perëndimore për të ndaluar luftën e Rusisë kundër Ukrainës.

Le Pen është në përpjekje të rrëzimit të presidentit Emmanuel Macron, i cili ka një epërsi të vogël në sondazhe përpara balotazhit presidencial të Francës më 24 prill.

Sipas Associated Press, këto janë disa nga mënyrat se si zgjedhjet franceze mund të ndikojnë në luftën në Ukrainë:

ARMATOSJA E UKRAINËS

Qeveria e Macron ka dërguar 100 milionë euro armë në Ukrainë në javët e fundit dhe tha të mërkurën se do të dërgojë edhe të tjera, si pjesë e një përpjekjeje për ndihmë ushtarake perëndimore. Franca ka qenë një burim kryesor i mbështetjes ushtarake për Ukrainën që nga viti 2014, kur Rusia aneksoi Krimenë në vitin 2014 nga Ukraina dhe mbështeti luftëtarët separatistë në Ukrainën lindore.

Por, Le Pen shprehu rezerva të mërkurën për furnizimin e Ukrainës me armë shtesë. Ajo tha se nëse do të zgjidhej presidente, do të vazhdonte ndihmën e mbrojtjes dhe inteligjencës, por do të ishte "e matur" në dërgimin e armëve, sepse ajo mendon se dërgesat mund të shtyjnë edhe vende të tjera në luftë me Rusinë.

ZBUTJA E SANKSIONEVE

Fushata e Le Pen ka prekur me sukses votuesit francezë të zhgënjyer për rritjen e inflacionit, i cili është përkeqësuar si pasojë e vendimit të presidentit rus Vladimir Putin për të pushtuar Ukrainën dhe sanksioneve perëndimore që pasuan kundër Rusisë, një furnizues kryesor i gazit dhe partner tregtar për Francën dhe Evropën.

Bashkimi Evropian ka qenë jashtëzakonisht i unifikuar në miratimin e pesë raundeve të sanksioneve gjithnjë e më të ashpra kundër Rusisë. Nëse Le Pen bëhet presidente e Francës, ajo mund të përpiqet të pengojë ose kufizojë sanksionet shtesë të BE-së, pasi veprimet e mëtejshme kërkojnë mbështetje unanime nga 27 vendet anëtare të bllokut.

Franca është ekonomia numër 2 e BE-së pas Gjermanisë dhe është vend kyç për vendimmarrjen e BE-së. Franca gjithashtu mban presidencën e radhës të BE-së, duke i dhënë udhëheqësit të ardhshëm të Francës ndikim të rëndësishëm.

Le Pen është veçanërisht kundër sanksioneve ndaj gazit dhe naftës ruse. Ajo tha gjithashtu në të kaluarën se do të punonte për të hequr sanksionet e vendosura ndaj Rusisë për aneksimin e Krimesë nga ana e saj, madje do të njihte Krimenë si pjesë të Rusisë.

BASHKIMI ME PUTININ

Më herët në mandatin e tij të parë, Macron u përpoq të afrohej me Putinin, duke e ftuar atë në Versajë-një vendpushim presidencial në Mesdhe, me shpresën për të rikthyer politikat e Rusisë në një linjë më ato të Perëndimit.

Presidenti francez gjithashtu kërkoi të ringjallë bisedimet e paqes midis Moskës dhe Kievit për konfliktin afatgjatë në Ukrainën lindore midis qeverisë dhe separatistëve të mbështetur nga Rusia. Macron vizitoi Putinin në Kremlin disa javë përpara pushtimit rus të Ukrainës më 24 shkurt dhe ka vazhduar të bisedojë me liderin rus gjatë luftës. Por, në të njëjtën kohë, Macron ka mbështetur raunde të shumta sanksionesh të BE-së.

Partia e Le Pen ka lidhje të thella me Rusinë. Ajo u takua me Putinin si kandidate presidenciale franceze në vitin 2017 dhe e ka lavdëruar atë në të kaluarën. Ajo u mirëprit ngrohtësisht në eventet e Ambasadës Ruse në Paris dhe partia e saj e ekstremit të djathtë mori gjithashtu një hua prej 9 milionë eurosh nga një bankë ruso-çeke, sepse ajo tha se bankat franceze refuzuan t'i jepnin hua partisë së saj.

Le Pen thotë se lufta në Ukrainë e ka ndryshuar pjesërisht mendjen e saj për Putinin, por të mërkurën ajo deklaroi se Perëndimi duhet të përpiqet të rivendosë marrëdhëniet me Rusinë sapo të përfundojë konflikti, duke sugjeruar një "afrim strategjik" midis NATO-s dhe Rusisë për të mbajtur Moskën larg një alenace të ngushtë me Kinën.

DOBESIMI I NATO-s DHE BE-se

Ndërsa Macron është një mbrojtës i vendosur i BE-së dhe së fundmi ka përforcuar pjesëmarrjen e Francës në operacionet e NATO-s në Evropën Lindore, Le Pen thotë se Franca duhet të mbajë distancën nga aleancat ndërkombëtare dhe të ndjekë rrugën e saj.

Ajo favorizon tërheqjen e Francës nga komanda ushtarake e NATO-s, e cila do të largonte personelin ushtarak francez nga trupi që planifikon operacionet dhe do të çonte në humbjen e ndikimit të vendit brenda aleancës ushtarake perëndimore.

Franca u tërhoq nga struktura komanduese e NATO-s në vitin 1966, kur presidenti francez Charles de Gaulle donte të distanconte vendin e tij nga organizata e dominuar nga ShBA-ja, por u riintegrua sërish nën presidentin konservator Nicolas Sarkozy në vitin 2009.

Nëse do të ishte në dorën e saj, Le Pen do të reduktonte shpenzimet franceze për Bashkimin Evropian dhe do të përpiqej të zvogëlonte ndikimin e tij.