ShBA-ja me Izraelin në GjND, thotë se gjykata s’duhet t’ia kërkojë tërheqjen nga Bregu Perëndimor
Shtetet e Bashkuara i kanë bërë thirrje Gjykatës Ndërkombëtare të Drejtësisë që të mos lëshojë opinion këshillëdhënës që do të thoshte se Izraelit i kërkohet menjëherë tërheqja nga Bregu Perëndimor dhe Jerusalemi Lindor, duke këmbëngulur se konflikti duhet të zgjidhet brenda “kornizës së formuar” për këtë qëllim.
ShBA-ja është ndër shtetet e pakta që kanë shprehur kundërshtim ndaj kërkesës së Autoritetit Palestinez dhe shumë shteteve të tjera në seancat e tanishme dëgjimore që gjykata të vlerësojë se “pushtimi ushtarak” i Bregut Perëndimor është i paligjshëm dhe ta urdhërojë Izraelin që menjëherë të bëjë hapa për t’i dhënë fund atij, përfshirë çmontimin e vendbanimeve, raporton gazeta “The Times of Israel”.
“Korniza e formuar për arritjen e një paqeje të qëndrueshme dhe të qëndrueshme është e ankoruar në rezolutat 242 dhe 338 të Këshillit të Sigurimit të OKB-së. Në bërthamën e tyre, këto dhe rezolutat pasuese bëjnë thirrje për zbatimin e kërkesave të ndërvarura e të pandashme për një paqe të gjatë e të qëndrueshme” – tha përfaqësuesi i ShBA-së në GjND, Richard Visek, këshilltar ligjor në Departamentin e Shtetit.
“Njëra është tërheqja e të gjitha forcave nga territori i pushtuar, tjetra është paqja dhe siguria për shtetet në Lindje të Mesme, përmes njohjes së sovranitetit, integritetit territorial, dhe pavarësisë politike të secilit shtet në zonë” – shtoi ai.
Visek-u argumenton se GjND-ja “nuk duhet të vlerësojë se Izraeli është ligjërisht i detyruar që të tërhiqet menjëherë dhe pa kushte nga territori i pushtuar” dhe thotë se gjykata, në vend të kësaj, mund të merret me pyetjet para kësaj “brenda kornizës së formuar, mbështetur në parimin tokë për paqe”.
