SHBA dhe Irani drejt nënshkrimit të marrëveshjejes që i jep fund luftës
Presidenti amerikan Donald Trump njoftoi të shtunën se një marrëveshje me Iranin pritet të nënshkruhet të dielën.
Trump shkroi në Truth Social se "menjëherë pas nënshkrimit, Ngushtica e Hormuzit do të hapet për të gjithë".
Ai krahasoi marrëveshjen e re me marrëveshjen bërthamore të epokës Obama, duke e quajtur këtë të fundit "një rrugë e lehtë drejt armës bërthamore".
Sipas Trump, nuk do të ketë shkëmbim parash ndryshe nga marrëveshjet e mëparshme.
Një zyrtar i lartë i administratës amerikane tha të shtunën se po merr formë një kornizë marrëveshjeje me Iranin.
Sipas tij, "kemi një marrëveshje, është një marrëveshje e shkëlqyer dhe shumë e fortë".
Zyrtari theksoi se Irani do të rihapë Ngushticën "pa tarifa kalimi", një kërkesë kyçe amerikane.
Në këmbim, SHBA do të heqë bllokadën ndaj porteve iraniane, ndërsa një fazë e mëvonshme do të përqendrohet në çminimin e ngushticës.
Megjithatë, zyrtarët iranianë kanë dhënë versione të ndryshme publike për gjendjen aktuale të bisedimeve.
Në Izrael, kryeministri Benjamin Netanyahu pritet të mbledhë kabinetin e sigurisë të dielën në mbrëmje.
Sipas Times of Israel, duke cituar Channel 12, zyrtarë të lartë izraelitë thanë se kushtet e raportuara të marrëveshjes "rrezikojnë interesat e sigurisë së Izraelit".
Ata pretenduan se Uashingtoni ka pranuar disa nga kërkesat kryesore të Teheranit, duke shkaktuar shqetësim në Jerusalem.
