Së paku 11 të vdekur nga një aksident i trenit në Indi
Të paktën 11 njerëz vdiqën të mërkurën nga një aksident hekurudhor në shtetin perëndimor indian, Maharashtra, kur ata zbritën nga treni nga frika prej një zjarri dhe u goditën nga një tren tjetër që po kalonte në binarët afër, raportuan mediat lokale.
Zyrtarë të hekurudhave u thanë mediave lokale se dikush e kishte tërhequr zinxhirin e alarmit të trenit, duke e shkaktuar ndaljen e tij, ndërsa më pas disa pasagjerë zbritën dhe shkelën në binarë të tjerë dhe u goditën nga treni tjetër, raporton agjencia e lajmeve “Reuters”.
“Sa u përket të dhënave, 11 njerëz kanë vdekur në aksident dhe pesë të tjerë janë lënduar” – tha Praveen Gedam, zyrtar i lartë i hekurudhave në rajonin Nashik.
Kryeministri rajonal, Devendra Fadnavis, tha se autoambulanca ishin dislokuar në vendin e ngjarjes – rreth 400 kilometra larg kryeqytetit financiar indian, Mumbai – dhe se po ndërmerreshin masat e nevojshme për trajtimin e të lënduarve.
Hekurudhat e Indisë janë rrjetin i katërt më i madh hekurudhor në botë dhe janë duke iu nënshtruar një modernizimi me vlerë prej 30 miliardë dollarësh si pjesë e përpjekjes së kryeministrit Narendra Modi për ta fuqizuar lidhjen mes vendbanimeve.
