Samiti i Shangait: Putin fajëson Perëndimin për luftën në Ukrainë
Presidenti kinez, Xi Jinping ka kritikuar “sjelljen ngacmuese” të disa vendeve, ndërsa Vladimir Putin ka fajësuar perëndimin për luftën e tij në Ukrainë, në ditën e dytë të një samiti të madh në Kinë që synon të sfidojë blloqet shumëpalëshe të udhëhequra nga perëndimi, shkruan The Guardian.
Samiti i Organizatës së Bashkëpunimit të Shangait (SCO) filloi të dielën në qytetin Tianjin, ku Xi mirëpriti dhjetëra liderë nga shtetet anëtare të Euroazisë dhe vende partnere e vëzhguese, përfshirë Putinin dhe kryeministrin indian Narendra Modi.
Në një fjalim para delegatëve të hënën, Putin deklaroi se lufta nuk u shkaktua nga pushtimi i plotë i Ukrainës nga Rusia në vitin 2022, por ishte “rezultat i një grusht shteti në Ukrainë, i cili u mbështet dhe u nxit nga perëndimi”.
“Arsyeja e dytë e krizës është përpjekja e vazhdueshme e perëndimit për ta futur Ukrainën në NATO,” shtoi presidenti rus.
Udhëheqësi kinez Xi Jinping mirëpriti presidentin rus Vladimir Putin gjatë një ceremonie në samitin e Organizatës së Bashkëpunimit të Shangait (SCO), para paradës së Ditës së Fitores.
Deklaratat e Putinit erdhën pas një fjalimi nga Xi, i cili tha se “detyrat e sigurisë dhe zhvillimit me të cilat përballen shtetet anëtare janë bërë edhe më sfiduese”, dhe i nxiti ata të “kundërshtojnë mentalitetin e Luftës së Ftohtë, konfrontimin e blloqeve dhe ngacmimin”.
