Rusia e akuzon Ukrainën për rrëzimin e aeroplanit ushtarak, asnjë i mbijetuar

Ministria e Jashtme e Rusisë thotë se Ukraina e ka rrëzuar aeroplanin ushtarak që u përplas në tokë të mërkurën në rajonin rus, Belgorod.

Kjo ministri e shoqëroi akuzën me shprehjen “akt barbar”, sipas raportimit të agjencisë shtetërore ruse të lajmeve, TASS, përcjell televizioni BBC.

Televizioni BBC ende nuk mund të vërtetojë se kush ndodhej në aeroplanin e rrëzuar ose çfarë e ka shkaktuar rrëzimin e tij.

Një zëdhënës i inteligjencës ushtarake të Ukrainës i ka thënë Radios “Evropa e Lirë” se një shkëmbim i të burgosurve mes Rusisë dhe Ukrainës ishte duke u përgatitur për të mërkurën.

Zëdhënësi Andriy Yusov citohet të ketë thënë: “Mund të deklaroj se shkëmbimi i planifikuar për sot ende nuk është duke u zhvilluar.”

Ai shtoi se ishte duke u kontrolluar informacioni i ofruar nga Rusia që në aeroplanin e rrëzuar ndodheshin të burgosur të luftës.

Në anën tjetër, guvernatori lokal në Belgorod të Rusisë, Vyacheslav Gladkov, tha se të gjithë personat që ndodheshin në aeroplanin e rrëzuar kanë vdekur.

Zyrtari rus shtoi se vendi i rrëzimit është rrethuar dhe se një hetim është duke u zhvilluar për këtë rast.