Rusia do të testojë shtatë raketa balistike ndërkontinentale më 2024
Rusia planifikon që të testojë hiç më pak se shtatë raketa balistike ndërkontinentale gjatë vitit të ardhshëm.
Kështu tha Sergei Karakayev, komandant i Forcave të Raketave Strategjike të Rusisë, raportoi të shtunën agjencia ruse e lajmeve, “Interfax”, përcjell Radio “Evropa e Lirë”.
Rusia i ka dhënë njoftime Shteteve të Bashkuara të paktën 24 orë para nisjes së testimeve të tilla dhe të njëjtën masë e ka zbatuar edhe Uashingtoni ndaj Moskës, citohet të ketë thënë komandanti rus për gazetën zyrtare të ushtrisë ruse, “Ylli i Kuq”.
Rusia dhe Shtetet e Bashkuara janë dy vendet me arsenalin më të madh bërthamor në botë.
Në tetor, Kremlini tha se kishte kryer ushtrim të një sulmi masiv bërthamor. Ministri i Mbrojtjes i Rusisë, Serge Shoigu, tha se në këtë ushtrim ishte përfshirë dhënia e “kundërpërgjigjes ndaj një sulmi bërthamor të armikut”.
Para pak muajve, deputetët rusë e mbështetën tërheqjen e ratifikimit të një traktati global me të cilin ndalohen të gjitha testimet fizike të kokave bërthamore.
