Rusia dhe Ukraina bien dakord për armëpushim në Detin e Zi, thotë ShBA-ja
SHBA-ja thotë se ka rënë dakord për një armëpushim detar me Rusinë dhe Ukrainën për të siguruar "lundrim të sigurt në Detin e Zi"; do të "zhvillojë masa" për të ndaluar sulmet ndaj energjisë
Shtëpia e Bardhë sapo ka publikuar dy deklarata nga bisedimet e saj me Rusinë dhe Ukrainën, duke shpallur në mënyrë efektive një marrëveshje për një armëpushim në det “për të siguruar lundrim të sigurt, për të eliminuar përdorimin e forcës dhe për të parandaluar përdorimin e anijeve tregtare për qëllime ushtarake në Detin e Zi.”
Gjithashtu, thuhet se të dy vendet ranë dakord të “zhvillojnë masa për zbatimin” e marrëveshjes së mëparshme për ndalimin e sulmeve ndaj infrastrukturës energjetike, sipas të dy deklaratave.
Ukraina dhe Rusia do të “vazhdojnë të punojnë për arritjen e një paqeje të qëndrueshme dhe të përhershme,” thuhet në deklarata, shkruan The Guardian.
Në deklaratën specifike për Ukrainën, Shtëpia e Bardhë gjithashtu tha se ShBA-ja konfirmoi se “mbetet e përkushtuar për të ndihmuar në shkëmbimin e robërve të luftës, lirimin e të ndaluarve civilë dhe kthimin e fëmijëve ukrainas të zhvendosur me forcë.”
Dokumenti specifik për Rusinë theksoi se ShBA-ja do të ndihmojë në “rivendosjen e aksesit të Rusisë në tregun global për eksportet bujqësore dhe të plehrave, uljen e kostove të sigurimit detar dhe përmirësimin e aksesit në portet dhe sistemet e pagesave për këto transaksione.”
Të dy versionet përfunduan duke theksuar se “Shtetet e Bashkuara përsëritën imperativin e Presidentit Donald J. Trump që vrasjet nga të dyja palët në konfliktin Rusi-Ukrainë duhet të ndalen, si hapi i nevojshëm drejt arritjes së një zgjidhjeje të qëndrueshme të paqes.”
