Qytezën ukrainase e merr uji pas sulmit ndaj digës, mjellmat shihen duke notuar rrugëve
Disa mjellma janë parë duke notuar nëpër qytezën ukrainase, Nova Kakhovka, në jug të Ukrainës, pasi një digë e madhe u sulmua dhe u thye, duke shkaktuar vërshime e evakuim të banorëve.
Në videon që e ka publikuar edhe televizioni BBC, dy mjellma shihen duke notuar mbi ujin e vërshimeve pranë një ndërtese me flamuj të Rusisë.
Ukraina i ka akuzuar forcat ruse për sulmin ndaj digës, por Kremlini e ka mohuar akuzën, duke thënë se Kievi qëllimisht e ka sabotuar hidrocentralin për ta larguar vëmendjen nga kundërofensiva.
Ministria e Jashtme e Ukrainës ka bërë thirrje që të organizohet një mbledhje urgjente e Këshillit të Sigurimit të Kombeve të Bashkuara për ta diskutuar atë që e quajti “akt terrorist kundër infrastrukturës kritike ukrainase”.
Përmes një deklarate, kjo ministri bëri thirrje që bordi i guvernatorëve të agjencisë bërthamore të OKB-së të diskutojë për incidentin dhe kërkoi sanksione të reja ndaj Rusisë nga Bashkimi Evropian dhe Grupi G7, me fokus të veçantë në industrinë e raketave dhe në sektorin bërthamor.
Bashkimi Evropian e ka dënuar shkatërrimin e digës në Nova Kakhovka, duke e quajtur “të tmerrshëm dhe barbar” këtë veprim.
“Kjo është një shenjë e re e eskalimit, duke e çuar në nivele të pashembullta natyrën e tmerrshme dhe barbare të agresionit rus kundër Ukrainës”- tha zëdhënësi i Komisionit Evropian, Peter Stano.