Pas Imamoglut, raportohet se Turqia e ka arrestuar edhe avokatin e tij, Mehmet Pehlivan
Autoritetet turke ndaluan një avokat të rivalit kryesor të presidentit Rexhep Erdogan, kryetarit të Stambollit Ekrem Imamoglu, tha të premten një deputete i partisë kryesore opozitare, CHP.
Imamoglu, anëtar i CHP-së që në disa sondazhe po del para Erdoganit, u burgos të dielën në pritje të gjykimit për ryshfet, duke i nxitur protestat më të mëdha antiqeveritare në një dekadë, të cilat rezultuan në arrestime masive në mbarë vendin, raporton agjencia e lajmeve “Reuters”.
Mehmet Pehlivan, avokat që e mbrojti Imamoglun në hetimin më të ri, u ndalua “për arsye të fabrikuara”, tha në një shkrim në rrjetin X deputeti opozitar i CHP-së, Turan Taskin Ozer, pa dhënë hollësi.
Imamoglu, i cili është shkarkuar përkohësisht nga detyra e kryetarit të Stambollit për shkak të rastit në gjykatë, e kërkoi lirimin e menjëhershëm të avokatit të tij.
“Sikur puçi ndaj demokracisë të mos mjaftonte, ata nuk mund të durojnë që viktimat e këtij puçi ta mbrojnë veten” – shkroi Imamoglu në rrjetin X.
Yasakçı akılda ne yalan biter ne de iftira. Bu sefer de uyduruk gerekçelerle avukatım Mehmet Pehlivan gözaltına alındı. Demokrasi darbesi yaptıkları yetmiyormuş gibi bu darbenin mağdurlarının kendilerini savunmasına da tahammül edemiyorlar. Demokrasi darbesine hukuk darbesini de…
— Ekrem İmamoğlu (@ekrem_imamoglu) March 27, 2025
Të enjten u raportua se Turqia e ka dëbuar gazetarin e BBC-së që i kishte mbuluar protestat antiqeveritare, Mark Lowen.
Shefja ekzekutive e “BBC News”, Deborah Turness, e quajti dëbimin e gazetarit “tepër shqetësues” dhe tha se televizioni do ta ngrejë këtë çështje tek autoritetet turke.
