Këshilltari i Zelenskyt thotë se sulmi në Kursk do ta detyrojë Rusinë që të bisedojë
Mykhailo Podolyak, ndihmës i lartë i presidentit ukrainas, Volodymyr Zelensky, ka thënë se njëri nga objektivat e sulmit të Ukrainës në Rusi është që Moska të detyrohet të zhvillojë bisedime sipas kushteve të Kievit.
“Ukraina nuk është e interesuar që të pushtojë territore ruse, por nëse po flasim për bisedime të mundshme – theksoj, të mundshme – ne do të duhet që ta vënë [Rusinë] në anën tjetër të tavolinës. Sipas kushteve tona” – tha Podolyak, raporton televizioni BBC.
Sipas tij, të tregohet që Ukraina është e aftë për të pushtuar territor rus do të ishte “mjet i dëshmuar, efikas i shtrëngimit” për ta detyruar Rusinë që të hyjë në bisedime.
“Në rajonin Kursk, ne qartazi mund të shohim se si vegla ushtarake po përdoret objektivisht për ta bindur [Rusinë] që të hyjë në një proces të drejtë të bisedimeve” – tha më tej ndihmësi i presidentit ukrainas.
Ai shtoi se sulmi i papritur matanë kufirit gjithashtu do të ketë ndikim tek opinioni publik, sepse “rusët qartazi ishin të frikësuar. Ata janë të tmerruar” nga aftësia e forcave të Ukrainës për të hyrë në territorin rus.
“Ndryshimet negative në gjendjen psikologjike të popullsisë ruse do të jenë një argument tjetër për fillimin e bisedimeve” – vlerësoi këshilltari presidencial ukrainas.
Sipas Ministrisë së Mbrojtjes të Britanisë së Madhe, mbrojtja kufitare ruse “nuk ishte e përgatitur” për sulmin ukrainas me disa batalione.
Reagimi fillestar i Rusisë ishte “rrëmujë dhe çorganizim”, sipas vlerësimit të kësaj ministrie, e cila shtoi se forcat ruse, megjithatë, janë ridislokuar nga zona të tjera përgjatë kufirit dhe tani po ndërtojnë “pozicione mbrojtëse shtesë në përpjekje për t’i parandaluar përparimet ukrainase”.
