Izraeli vret me dron dy të rritur e tre fëmijë në jug të Libanit

Një sulm izraelit me dron la të vrarë të dielën pesë njerëz, përfshirë tre fëmijë, në qytezën jugore libaneze, Bint Jbeil, tha Ministria e Shëndetësisë e Libanit.

Izraeli shpesh i ka vënë në shënjestër ato që i quan pozicione të Hezbollahut në jug të Libanit pavarësisht armëpushimit të ndërmjetësuar nga Shtetet e Bashkuara mes Izraelit e Libanit, i cili hyri në fuqi në nëntorin e vitit të kaluar pas më shumë se një viti konflikt, i nxitur nga lufta në Gaza, raporton agjencia e lajmeve “Reuters”.

Agjencia shtetërore libaneze e lajmeve tha se nga sulmi u goditën një motoçikletë dhe një automjet. Përpos të vrarëve, dy persona të tjerë u lënduan.

Kryetari i Kuvendit të Libanit, Nabih Berri, tha në një deklaratë se një baba dhe tre fëmijët e tij ishin në mesin e të vrarëve, ndërsa nëna pësoi lëndime. Sipas Berrit, ata kishin shtetësi amerikane.

“Përderisa situata është e ndryshueshme, deri më tani, shenjat janë se pesë të vrarët nuk ishin shtetas amerikanë. Në të vërtetë, njëri kishte kërkesë të pashfrytëzuar të vizës për imigrantë në të kaluarën” – tha një zëdhënës i Departamentit të Shtetit.

Ushtria izraelite tha se vrau një anëtar të Hezbollahut në sulm, por se “disa civilë të papërfshirë u vranë”.

“Forcave të Mbrojtjes të Izraelit u vjen keq për çfarëdo dëmi ndaj individëve të papërfshirë dhe operojmë për ta minimizuar dëmin sa më shumë që është e mundshme. Incidenti është duke u analizuar” – tha ushtria izraelite në një deklaratë.

Kryeministri i Libanit, Nawaf Salam, në rrjetin X sulmin e përshkroi si “krim të hapur kundër civilëve dhe porosi frikësimi drejtuar popullit tonë që po kthehet në fshatrat e veta në jug”.

Libani është nën trysninë e Shteteve të Bashkuara, Arabisë Saudite dhe rivalëve të brendshëm të Hezbollahut që ta çarmatos grupin e mbështetur nga Irani.

Hezbollahu ka thënë se do të ishte hap i gabuar serioz madje vetëm diskutimi i çarmatosjes përderisa Izraeli po i vazhdon sulmet ajrore ndaj Libanit dhe pushtimin e territoreve në jug të këtij vendi./Nacionale