Inteligjenca ukrainase: Rusia planifikon të prodhojë deri në 120 mijë bomba rrëshqitëse këtë vit

Rusia planifikon që të prodhojë deri në 120.000 bomba rrëshqitëse (fluturuese) këtë vit – armë të lira por shkatërruese – sipas një zyrtari të lartë të inteligjencës ukrainase, përfshirë 500 bomba të tilla të një versioni të ri me rreze të gjatë veprimi, që mund të arrijnë më shumë qyteza e qytete.

Federata Ruse e ka shtuar prodhimin e armëve në mënyrë masive që nga fillimi i pushtimit të plotë të Ukrainës më 2022. Moska nuk zbulon hollësi të prodhimit ushtarak, i cili konsiderohet sekret, raporton agjencia e lajmeve “Reuters”.

Shifra prej 120.00 bombash rrëshqitëse si cak i Rusisë u dha në një intervistë nga zëvendësdrejtori i Inteligjencës së Mbrojtjes të Ukrainës, Gjeneral Major Vadym Skibitskyi. Agjencia “Reuters” nuk arriti që ta vërtetonte cakun e Rusisë për prodhimin e këtyre bombave për vitin 2025.

Skibitskyi nuk tregoi se si ishte siguruar ky numër e as nuk dha të dhëna të mëhershme, por një shifër e tillë do të tregonte rrite të madhe të prodhimit të bombave rrëshqitëse, të cilat kanë krahë dhe nganjëherë edhe motorë për të fluturuar me dhjetëra kilometra deri te caku i tyre.

Në numrin prej 120 mijë bombash përfshihen municioni i ri si dhe bombat ekzistuese që janë modernizuar për të rrëshqitur. Zyrtari i inteligjencës tha se forcat ruse po hedhin nga 200 deri në 250 bomba rrëshqitëse çdo ditë. Muajin e kaluar, mesatarja ditore ishte rreth 170, sipas të dhënave të Ministrisë së Mbrojtjes.

“Është e mundshme që të rrëzohen, por sasia e atyre bombave ajrore të prodhuara në Federatën Ruse.. është e pamasë. Ky është një kërcënim, një kërcënim që do të kërkojë nga ne të kundërpërgjigjemi në mënyrën e duhur” – tha Skibitskyi.

Bombat rrëshqitëse, të cilat më parë besohej se kishin rreze deri në 90 kilometra, mund të depërtojnë nëpër mbrojtjen ukrainase pa dërguar aeroplanë në vijat e frontit, ku do të rrëzoheshin.

Ato janë shumë më të lira dhe më të bollshme se raketat dhe lënda e tyre shpërthyese prej disa qindra kilogramësh mund depërtojë në ndërtesa e fortifikata. Me to janë goditur qytete të vijës së frontit si Kharkivi e Khersoni, transmeton gazeta "Nacionale".

Skibitskyi tha se Rusia po e nis prodhimin e një bombe të re rrëshqitëse që mund të fluturojë deri në 200 kilometra nga pika e lëshimit nga një aeroplan luftarak dhe se shteti armik planifikon që të prodhojë rreth 500 të tilla deri në fundin e këtij viti.