Hamasi thotë se do të dorëzojë edhe dy pengje të vdekura të martën në mbrëmje
Hamasi njoftoi të martën se do t’ia dorëzojë Izraelit trupat e dy pengjeve të vdekura në orën 21:00, një ditë pasi e dorëzoi trupin e pengut Tal Haimi.
Krahu ushtarak i Hamasit tha se dy pengjet e vdekura që do të dorëzohen “u nxorën sot në Rripin e Gazës”, por nuk i identifikoi ato, shkruan gazeta “The Times of Israel”.
Gjatë dorëzimit të trupave të tjerë, kufomat ishin transportuar nga Kryqi i Kuq deri te forcat izraelite dhe më pas ishin dërguar në institutin e forenzikës “Abu Kabir” në Tel-Aviv për identifikim.
Në përputhje me marrëveshjen e armëpushimit, Hamasi të hënën e kaluar i liroi 20 pengjet e fundit të gjalla, brenda 72 orësh nga tërheqja e forcave izraelite në Vijën e Verdhë. Hamasi gjithashtu i ka kthyer mbetjet e 13 pengjeve të vdekura që nga fillimi i armëpushimit.
Në mesin e 15 pengjeve të vdekura që nuk janë kthyer ende është një ushtar i vrarë gjatë luftimeve në luftën e vitit 2014 – pengu i fundit para periudhës së sulmit të vitit 2023, i cili më pas do ta nxiste fillimin e luftës.
Ndërkohë, Kryqi i Kuq tha të martën se e lehtësoi transferimin e 15 trupave të palestinezëve nga Izraeli në Gaza sipas marrëveshjes së armëpushimit. Kështu, numri i përgjithshëm i trupave të dorëzuar të palestinezëve shkoi në 165.
Sipas marrëveshjes së armëpushimit në Gaza, Izraeli i kthen trupat e 15 palestinezëve për secilin trup të pengjeve që dorëzohet nga Hamasi.
Më herët të martën, dy ushtarë izraelitë pësuan lëndime të lehta, pasi tanku në të cilin ndodheshin u godit nga një mjet shpërthyes në zonën e qytetit Khan Younis në jug të Rripit të Gazës, tha ushtria izraelite./Nacionale
