Fshatarët ukrainas helmojnë ushtarët e Putinit me qershi

Ushtarët rusë vjedhin rregullisht perime dhe drithëra në Ukrainë. Fermerëve në Melitopol iu mjaftoi kjo - dhe i helmuan qershitë e tyre.

Fshatarët ukrainas e kanë të vështirë të mbrohen kundër pushtuesve të armatosur nga Rusia. Megjithatë, siç rezulton, fermerët me siguri po përdorin të gjitha mjetet që kanë në dispozicion për të sabotuar luftëtarët kundërshtarë.

Në qytetin ukrainas të Melitopol, disa fermerë thuhet se kanë helmuar qershitë e tyre, tha Ivan Fedorov, kryebashkiak i Melitopol, për Ukrainian News.

"Fshatarët tanë kanë përgatitur një dhuratë për fashistët rusë - qershi të ëmbla të sapo trajtuara, të cilat kanë shkaktuar një sëmundje masive te rusët", shpjegoi kryebashkiaku. Deklaratat e tij nuk mund të verifikoheshin në mënyrë të pavarur.

Ideja erdhi për shkak se trupat e shefit të Kremlinit, Vladimir Putin vidhnin rregullisht të korrat nga fermerët vendas.

"Kjo është një lloj lëvizjeje partizane, rezistencë që ekziston sot në territorin e rrethit Melitopol", tha Fedorov. “Nuk duhet të na vidhni asgjë, gjithçka është rritur me mundin e fermerëve tanë”.

Qyteti i Melitopolit, i vendosur në jug të vendit, është pushtuar nga Rusia që në ditët e para të luftës. Sidoqoftë, sipas Ivan Fedorov, popullsia lokale ende nuk po dorëzohet. Të dielën, banorët e qytetit mund të prisnin në radhë për një pasaportë ruse. Sipas kryebashkiakut, "vetëm 15 nga 70,000 banorët që mbetën në qytetin e pushtuar përkohësisht" përfituan nga oferta.

Fedorov duhej të përjetonte dhunën e rusëve nga dora e parë. Pas pushtimit rus, ukrainasi u rrëmbye me një qese plastike mbi kokë dhe u mor në pyetje për disa ditë. Fotot e rrëmbimit të tij bënë xhiron e botës. Politikani u lirua më vonë si rezultat i një shkëmbimi të të burgosurve. /Nacionale/