Eskalon përplasja Ukrainë – Britani, Zelensky e shkarkon ambasadorin që e mbrojti sekretarin Wallace

Presidenti i Ukrainës, Volodymyr Zelensky, duket se nuk i duron shumë kritikat e zyrtarëve ukrainas. Të premten, ai e shkarkoi ambasadorin ukrainas në Mbretëri të Bashkuar, Vadym Prystaiko.

Ambasadori ukrainas në Londër e kishte kritikuar kundërpërgjigjen e presidentit ndaj një kritike të sekretarit britanik të Mbrojtjes, Ben Wallace, i cili kishte thënë se pritet që Ukraina të jetë më shumë mirënjohëse për furnizimin me armë nga aleatët, raporton revista amerikane, "Barron's".

Në kundërpërgjigjen me tallje, Zelensky kishte thënë: “Si mund ta shfaqim mirënjohjen tonë ndryshe? Mund të zgjohemi në mëngjes dhe ta falënderojmë ministrin. Le të më shkruajë dhe le të më tregojë se si ta falënderoj."

Kur u pyet për komentet e sekretarit britanik, presidenti ukrainas gjithashtu tha: “Mendoja se gjithmonë ishim shumë mirënjohës ndaj Britanisë” dhe kërkoi nga ministri i Mbrojtjes, Oleksii Reznikov, i cili ishte në audiencë, që ta telefononte homologun e tij britanik urgjentisht dhe ta falënderonte përsëri për përkrahjen.

Ambasdori ukrainas në Londër i kritikoi komentet e presidentit në Sky News, duke thënë: “Presidenti Zelensky, që thotë “për çdo mëngjes do të zgjohemi dhe do ta telefonojmë Ben Wallace-n për ta falënderuar” – nuk mendoj se ky lloj sarkazmi është i shëndetshëm. Nuk mendoj se duhet t’u tregojmë rusëve se ka diçka mes nesh. Ne po punojmë bashkë, Beni mund të më telefonojë dhe të më thotë çfarëdo që dëshiron.”