E vranë duke e rrahur, pritet publikimi i pamjeve nga arrestimi që i mori jetën 29-vjeçarit me ngjyrë në ShBA
Një 29-vjeçar ka humbur jetën pas një procesi të dhunshëm të arrestimit në Memphis, ShBA.
Sipas avokatit të familjes së viktimës, Tyre Nichols, burrë me ngjyrë, ishte ndaluar nga pesë policë, po ashtu me ngjyrë, gjatë rrugës për në shtëpi, pasi e kishte fotografuar perëndimin e diellit në një park. Ndërsa policët thonë se ai dyshohej për vozitje të pakujdesshme, është bërë e ditur se viktima kishte të vendosur një kamerë trupi që ka regjistrur edhe dhunën e ushtruar ndaj tij nga policët.
Shefi i policisë së Memphis, ka bërë të ditur se pamjet që cilësohen shumë të dhunshme të arrestimit të Nichols me 7 janar, do të publikohen gjatë të premtes.
“Pamjet video të arrestimit të dhunshëm të Tyre Nichols më 7 janar do të publikohen në YouTube në katër pjesë - që tregojnë ndalimin fillestar, ndalimin pranë shtëpisë së Nichols dhe pamjet e kamerës së trupit të individëve në vendngjarje - diku pas orës 19:00 të premten,” – ka deklaruar shefi i policisë së Memphis, Cerelyn "CJ" Davis.
CNN tashmë ka arritur të marrë pjesë së audios nga skenari që ka çuar në arrestimin e dhunshëm të 29-vjeçarit me ngjyrë. Sipas medias amerikane në audio mund të dëgjohen pjesë të shkurtëra bisede midis oficerëve.
“Dëgjohet një oficer duke thënë: Ne kemi një mashkull të zi që vrapon dhe jep udhëzime për të drejtuar etiketën e regjistrimit të makinës dhe për të parë se cila është adresa",- përshkruan CNN audion e dëgjuar, ndërsa më pas shkruan se audio përcillet nga një tingull i Nichols që duket në ankth.
Pamjet nga arrestimi që kanë çuar në vdekjen e 29-vjeçarit, janë parë edhe avokatët e familjes, të cilët i kanë përshkruar të neveritshme.
Duke shtuar se ishin pamje të mjerueshme të rrahjes, avokati i familjes Ben Crump ka thënë se Wells, nëna e Nichols, nuk ishte në gjendje të kalonte shikimin e minutës së parë të filmimit pasi kishte dëgjuar Nichols të pyeste: "Çfarë bëra?"
Avokati më tej ka thënë se, në fund të filmimit, Nichols mund të dëgjohet duke thirrur nënën e tij tre herë.
Sipas njerkut të Nichols, ai kishte ikur nga policia sepse kishte pasur frikë.
"Djali ynë vrapoi sepse ishte i frikësuar për jetën e tij," është shprehur Wells, duke shtuar se “ai nuk po përpiqej të hiqte qafe asnjë drogë, asnjë armë, asnjë nga këto. Ai vrapoi sepse kishte frikë për jetën e tij. Dhe kur ta shihni videon, do të shihni pse ai u frikësua për jetën e tij.”
E ndërkohë që pritet publikimi i pamjeve të rrahjes së Nichols nga policia, qytetet në të gjithë vendin janë duke u përgatitur për protesta. Mediet lokale raportojnë se situata në Memphis është e tensionuar dhe policia i ka shtuar patrullimet në qendrën e qytetit.
Është bërë e ditur se pesë oficerët të Departamentit të Policisë në Memphis, të cilët gjithashtu janë me ngjyrë, janë pushuar nga puna pas një hetimi të brendshëm dhe po përballen me akuza penale, përfshirë vrasjen e shkallës së dytë.
