Dyshja babë e bir, që dyshohet se qëndrojnë pas të shtënave ndaj komunitetit hebre, përdorën armë zjarri me leje
Sulmuesit e dyshuar pas sulmit në plazhin Bondi janë babë e bir, të cilët dyshohet se kanë përdorur armë zjarri të siguruara ligjërisht për të kryer masakrën, sipas policisë, shkruan The Guardian.
Naveed Akram, 24 vjeç, u arrestua në vendngjarje dhe u dërgua në një spital të Sidneit me lëndime kritike. Babai i tij 50-vjeçar, të cilin Sydney Morning Herald e raportoi fillimisht si Sajid Akram, u vra nga policia.
Dyshohet se dyshja vranë 15 persona, ndërsa dhjetëra të tjerë mbetën të plagosur nga të shtënat që ndodhën të dielën, gjatë një tubimi për të festuar natën e parë të Hanukës.
Djali ishte i njohur për policinë e Uellsit të Ri Jugor (New South Wales) dhe agjencitë e sigurisë, ndërsa babai i tij zotëronte një leje armësh me gjashtë armë të regjistruara në emër të tij. Të gjashta armët janë gjetur, tha policia.
Katër nga këto armë, armë të gjata që besohet se përfshijnë një pushkë dhe një armë gjahu, u sekuestruan në vendngjarje në Bondi, ndërsa armë të tjera u gjetën gjithashtu gjatë një bastisjeje policore në një shtëpi në Campsie, në jugperëndim të Sidneit.
Naveed Akram, i cili punonte si murator, ra në vëmendjen e Organizatës Australiane të Inteligjencës së Sigurisë (ASIO) në tetor 2019, sipas kryeministrit Anthony Albanese. Ai u hetua për gjashtë muaj për shkak të lidhjeve të tij të supozuara me të tjerë, ndërsa ABC raporton pretendime se hetimi kundër terrorizmit përfshinte një celulë të Shtetit Islamik.
“[Naveed Akram] u hetua mbi bazën e lidhjeve me të tjerë dhe vlerësimi ishte se nuk kishte asnjë tregues për ndonjë kërcënim të vazhdueshëm apo rrezik që ai të përfshihej në dhunë,” tha Albanese.
Komisioneri i policisë së NSW, Mal Lanyon, tha se dy burrat kishin jetuar në një shtëpi tjetër në Bonnyrigg, në perëndim të qytetit, e cila gjithashtu u bastis të dielën mbrëma. Ai tha se nuk kishte asgjë "që të tregonte se ndonjëri nga burrat e përfshirë në sulmin e djeshëm po planifikonte sulmin", dhe konfirmoi se burri më i vjetër kishte pasur leje arme për një dekadë.
