Bujqit francezë bllokojnë rrugë në mbarë vendin, duan të shkojnë edhe në Bruksel
Shumë bujq francezë mbajtën protesta të mërkurën në mbarë vendin dhe në Bruksel kundër pagave të ulëta dhe atyre që i konsiderojnë rregullore të tepërta, kosto në rritje e probleme të tjera.
Bllikimi i rrugëve po përhapej në shumë rajone franceze, një ditë pasi një fermere dhe vajza e saj vdiqën për shkak të një përplasjeje në trafik në një barrikadë, raporton agjencia “Associated Press”.
Bujqit kanë kthyer mbrapsht edhe shenja të trafikut për të protestuar kundër atyre që i quajnë politika bujqësore joesenciale.
Disa bujq po planifikonin që të protestonin edhe në Bruksel, ku ndodhen institucionet qendrore të Bashkimit Evropian dhe ku sindikata franceze e bujqve, Bashkërendimi Rural, bëri thirrje për një protestë kundër “kufizimeve në rritje të rregulloreve evropiane dhe të ardhurave gjithnjë më të ulëta”.
Këto protesta janë sfida e parë e rëndësishme për kryeministrin e porsaemëruar, Gabriel Attal, i cili u vendos në këtë pozitë para dy jave, dhe për qeverinë e tij. Attali u takua të martën me disa përfaqësues të sindikatave të bujqve.
Pas këtij takimi, ministri i Bujqësisë, Marc Fesneau, premtoi se do të bënte propozime të reja për t’iu përgjigjur krizës deri në fund të javës, përfshirë ato në lidhje me çmimet e ushqimit dhe thjeshtimin e rregulloreve.
Arnaud Rousseau, kryetar i sindikatës franceze të bujqve, FNSEA, tha se organizata e tij do të publikojë të mërkurën më vonë një listë prej 40 masave të nevojshme. Duke folur në televizion, ai tha se qëllimi i lëvizjes protestuese është që “të merren rezultate të shpejta”.
