Borrelli thotë se vendet e BE-së duhet t’i dërgojë Ukrainës sisteme anti-raketore
Kryediplomati i Bashkimit Evropian, Josep Borrell, tha të enjten se shtetet e këtij blloku duhet t’i dërgojnë Ukrainës sisteme të veta anti-raketore për t’ia fuqizuar mbrojtjen ajrore, duke paralajmëruar se Evropa nuk mund të mbështetet vetëm te ShBA-ja për ta ndihmuar Kievin.
“Ne kemi [sisteme] Patriot, kemi sisteme anti-raketore. Ne duhet t’i nxjerrim ato nga kazermat tona, ku ato ndodhen për çdo rast, dhe t’i dërgojmë ato në Ukrainë, ku po zhvillohet lufta” – tha para gazetarëve shefi i politikës së jashtme të BE-së para një takimi të ministrave të jashtëm të vendeve të Grupit G7 në Itali, raporton agjencia “Reuters”.
“Në të kundërtën, sistemi energjetik i Ukrainës do të shkatërrohet dhe asnjë shtet nuk mund të luftojë pa pasur rrymë në shtëpi, në fabrika, në internet, për gjithçka” – paralajmëroi zyrtari i lartë evropian.
Mbrojtja ajrore e Ukrainës është çështje kyçe për ministrat e mbledhur në Itali, pas një apeli të Gjermanisë të mërkurën ndaj BE-së dhe NATO-s që të bëjnë më shumë për ta ndihmuar Kievin.
“Unë jam i sigurt se do ta bëjmë atë, por duhet ta përfundojmë më shpejt” – tha Borrelli, duke shtuar se i vjen keq për “politikat e brendshme” në ShBA që po e shtyjnë pakon shumë të nevojshme të ndihmave për Ukrainën me vlerë të më shumë se 60 miliardë dollarëve.
“Ne nuk mund të mbështetemi vetëm te ShBA-ja. Duhet ta marrim përgjegjësinë tonë dhe të ndalojmë së thëni: O, ShBA-ja do ta bëjë” – tha zyrtari i lartë evropian.
Pakoja amerikane e ndihmave për Ukrainën dhe Izraelin ka mbetur me muaj e bllokuar në Dhomën e Përfaqësuesve të ShBA-së, edhe pse është miratuar nga Senati.
